आईएमई लाईफ इन्स्योरेन्सको चौथौ त्रैमासको वित्तिय विवरण अनुसार कम्पनीले १२ महिनाको अवधिमा एक अर्ब ४५ करोड १८ लाख रुपैयाको कूल बीमाशुल्क आर्जन गरेको छ ।
चालु आर्थिक वर्षको असार मसान्तको अन्त्यसम्ममा कम्पनीले एक करोड ११ लाख ४५ हजार रुपैयाँ कुल दाबी भुक्तानी गरेको छ । गत आवको सोही अवधिमा कम्पनीले ५५ लाख रुपैयाँ दाबी भुक्तानी गरेको थियो ।
कम्पनीले १४ वटा दाबी फस्र्यौट गर्दै सो भुक्तानी गरेको हो । गत आवको सोही अवधिमा कम्पनीले चार वटा दाबीको भुक्तानी गरेको थियो ।
कम्पनीले आर्थिक वर्ष २०७५/७६ को चौथो त्रैमाससम्म आइपुग्दा १० करोड ४० लाख ५८ हजार ४९६ रुपैयाँ खुद नाफा कमाएको छ । गत आर्थिक वर्षको सोही अवधिमा कम्पनीले नौ करोड ८६ लाख ३२ हजार ३०१ रुपैयाँ खुद नाफा कमाएको थियो ।
गत आवको असार मसान्तसम्ममा कम्पनीको चुक्ता पूँजी १ अर्ब ४०करोड रुपैयाँ रहेको छ । यस्तै कम्पनीको जीवन बीमा कोषमा ७० करोड २५ लाख, १८ करोड १६ लाख रुपैयाँ रहेको छ । अघिल्लो आर्थिक बर्षको सोही अवधिमा कम्पनीको जगेडा कोषमा ९ करोड ८४ लाख रुपैयाँ संचित रहेको थियो ।
वित्तीय विवरणमा हाल कम्पनीको १० हजार ८ सय ७९ वटा बीमा लेखहरु कायम रहेको उल्लेख छ । चालु आवको चौथौ त्रैमासमा कम्पनीको प्रतिशेयर आम्दानी ७ रुपैयाँ ४३ पैसा, प्रतिशेयर नेटवर्थ ११३ रुपैयाँ ५८ पैसा रहेको छ ।
आईएमई लाइफ इन्स्योरेन्सको वित्तिय विवरणमा देखिएको मुनाफामा भने हेरफेर हुनसक्छ । जीवन बीमा कम्पनीहरुको अन्तिम मुनाफा अडिटबाट बीमांकीय मूल्याङ्कनले भूमिका खेल्ने हुँदा फरक पर्न सक्नेछ ।
