काठमाडौं । स्वास्थ्य बीमा कार्यक्रममा आबद्ध सेवा प्रदायक स्वास्थ्य संस्थाले अब दाबी प्रविष्ट गर्दा स्ट्यान्डर्ड डिस्चार्ज समरी अनिवार्य रुपमा पेस गर्नुपर्ने भएको छ।
स्वास्थ्य बीमा बोर्डले सबै सेवा प्रदायक स्वास्थ्य संस्थालाई परिपत्र जारी गर्दै दाबी प्रविष्ट गर्दा स्ट्यान्डर्ड डिस्चार्ज समरी अनिवार्य रुपमा पेस गर्न निर्देशन दिएको हो।
बीमा बोर्डले बीमा दाबी समीक्षा तथा मूल्यांकन कार्यविधि, २०७८ (पहिलो संशोधन २०८१)को उपदफा (३)को (ग) बमोजिम तयार भएको स्ट्यान्डर्ड डिस्चार्ज समरी अनिवार्य गरेको थियो। उक्त संशोधन बीमा बोर्डको गत माघ २ गतेको बैठकले स्वीकृत गरेको थियो।
अब सेवा प्रदायक स्वास्थ्य संस्थाले आउँदो फागुन १ गतेबाट दाबी प्रबिष्ट गर्दा अनिवार्य रुपमा स्ट्यान्डर्ड डिस्चार्ज समरी फर्म्याट कार्यान्वयन गर्नुपर्नेछ।
संशोधन उपदफामा सेवा प्रदायक स्वास्थ्य संस्थाले दाबी प्रविष्ट गर्दा आईएमआईएसमा अन्तिम निदान, चिकित्सकको एनएमसी नम्बर र स्वास्थ्य बीमा बोर्डले तयार गरेको स्ट्यान्डर्ड डिस्चार्ज समरी अनिवार्य हुनुपर्ने व्यवस्था गरिएको छ।
Standard_Discharge_Summary
