काठमाडौं । अमेरिकी व्यापारी एलन मस्कको कम्पनी, स्टारलिङ्कले भूउपग्रहमा आधारित इन्टरनेट सेवा सञ्चालनका लागि बंगलादेश दूरसञ्चार नियामक आयोगमा इजाजतपत्रको लागि आवेदन दिएको छ। बंगलादेश सरकार र स्टारलिङ्क दुबैले, भूउपग्रह-आधारित इन्टरनेट सेवाहरूको द्रुत प्रवेशलाई सहज बनाउन खोजिरहेकाले स्टारलिङ्कले आवेदन दिएको हो।
बंगलादेशी आम सञ्चार गृहहरूका अनुसार स्टार लिंकले गत साता नै आवेदन दिएको हो। यसअघि, मार्च २९ मा, अमेरिकामा आधारित स्याटेलाइट इन्टरनेट सेवा प्रदायकले बंगलादेश लगानी विकास प्राधिकरणबाट देशमा सञ्चालन शुरू गर्न स्वीकृति प्राप्त गरेको थियो।
बंगलादेश, स्टारलिङ्कको सेवा भित्र्याउने दोश्रो दक्षिण एशियाली मुलुक बनेको छ। यसअघि श्रीलंकाले गत वर्ष नै स्टारलिङ्कको सेवा भित्र्याइ सकेको छ। कम्पनीले भारत र नेपालमा पनि सेवा बिस्तारका लागि प्रयास जारी राखेको छ।
स्टारलिङ्कले सेवा शुरू गर्न अब इन्टरनेट नियामकबाट अन्तिम नियामक स्वीकृति प्राप्त गर्नुपर्नेछ। यो स्वीकृत भएसँगै स्टारलिङ्क गत मार्च २५ मा लागू गरिएको गैर-भू-स्थिर कक्ष दिशानिर्देशहरू अन्तर्गत इजाजतपत्र प्राप्त गर्ने पहिलो कम्पनी बन्नेछ।
इन्टरनेट सेवाका लागि आवेदन र प्रशोधन शुल्क ५ लाख रुपैयाँ तोकिएको छ, इजाजतपत्र प्राप्ति शुल्क १०,००० अमेरिकी डलर र वार्षिक शुल्क ३०,००० अमेरिकी डलर रहेको छ। यसबाहेक प्रति टर्मिनल १ अमेरिकी डलरको वार्षिक स्टेशन, टर्मिनल शुल्क लाग्नेछ। यद्यपि, इन्टरनेट अफ थिङ्गस सेवाहरू प्रदान गर्न विशेष रूपमा प्रयोग गरिने टर्मिनलहरूको लागि कुनै शुल्क लाग्नेछैन।
इजाजतपत्र प्राप्तकर्ताहरूले ब्यान्डविथको लागि सरकारी स्वामित्वमा रहेको अन्तर्राष्ट्रिय इन्टरनेट गेटवेमार्फत आफ्नो गेटवे जडान गर्छन् वा बंगलादेशी उपग्रह कम्पनीसँग साझेदारी वा संयुक्त उद्यम बनाउँछन् भने आवेदन, प्रशोधन, अधिग्रहण र वार्षिक इजाजतपत्र शुल्कमा २५ प्रतिशत कटौती प्राप्त गर्ने द डेली स्टारले उल्लेख गरेको छ।
पहिलो दुई वर्षको लागि कुनै आम्दानी बाँडफाँड दायित्व हुनेछैन। इजाजतपत्र प्राप्तकर्ताहरूले तेस्रो देखि पाँचौं वर्षसम्म कुल आम्दानीको ३ प्रतिशत र छैठाैं वर्षदेखि ५.५ प्रतिशत बाँडफाँड गर्नुपर्नेछ।
इजाजतपत्रको अतिरिक्त, स्टारलिङ्क जस्ता कम्पनीहरूले आफ्नो सेवाहरू सुरु गर्न आवश्यक स्पेक्ट्रम प्राप्त गर्न गैर-भूस्थिर कक्ष उपग्रह सेवाहरूको लागि छुट्टै रेडियो सञ्चार उपकरण इजाजतपत्र पनि प्राप्त गर्नुपर्छ। गत मार्चमा,सरकारका मुख्य सल्लाहकार मुहम्मद युनुसले अधिकारीहरूलाई ९० दिन भित्र स्टारलिङ्कको व्यावसायिक प्रक्षेपण सुनिश्चित गर्न निर्देशन दिएका थिए।
