काठमाडौं । स्वास्थ्य बीमा बोर्डको कार्यकारी निर्देशक पदमा ३ जनाको नाम सिफारिस गरिएको छ । लोकसेवा आयोगले स्वास्थ्य बीमा बोर्डको कार्यकारी निर्देशक छनौटका लिएको प्रस्तुतीकरण तथा अन्तर्वार्तापछि स्वास्थ्य तथा जनसंख्या मन्त्रालयलाई तीन जनाको नाम सिफारिस गरेको हो ।
लोकसेवा आयोगबाट सिफारिस भएका ३ जना मध्ये एक जनालाई स्वास्थ्य तथा जनसंख्या मन्त्रालयको सिफारिसमा मन्त्रिपरिषदको बैठकले बोर्डको कार्यकारी निर्देशकमा नियुक्त गर्नेछ ।
बिहिवार सम्पन्न भएको अन्तर्वार्तापछि आयोगले हिजो मन्त्रालय समक्ष सिफारिस गरेको आयोग स्रोतले जनाएको छ । आयोगका अध्यक्षको सचिवालयले डा. दामोदर बसौला, डा. कृष्णप्रसाद अधिकारी र सुदर्शन पौडेलको नाम सिफारिस गरेको जनाइएको छ । उल्लेखित ३ जना मध्येबाट आयोगले एक जनालाई बोर्डको कार्यकारी निर्देशक बनाउनेछ ।
यसअघि स्वास्थ्य तथा जनसंख्या मन्त्रालयले कार्यकारी निर्देशक छनौट समिति गठन गरेको थियो । सो समितिले गत २७ भदौमा १५ दिनको अवधी दिएर दरखास्त आव्हान गरेको थियो । प्रतिस्पर्धामा ८ जना सहभागी थिए ।
