काठमाडौं । नेपालको प्रचलित बीमा कानुन अनुसार नेपाली बीमक कम्पनीहरुले जोखिम बाँडफाँडको लागि गर्ने पुनर्बीमाको लागि विदेशी कम्पनी भए अन्तर्राष्ट्रियस्तरको रेटिङ कम्पनीमार्फत कम्तीमा ए+ र अन्य कम्पनीको लागि कम्तीमा बी+ रेटिङ अनिवार्य गरेको छ ।
बीमा समितिले जारी गरेको पुनर्बीमा व्यवसाय सञ्चालन तथा व्यवस्थापन निर्देशिका २०७१ को दफा ६ को उपदफा ८ मा यस सम्बन्धी स्पष्ट व्यवस्था गरेको छ । सो बमोजिम नेपालको पुनर्बीमा कम्पनीले बीमकबाट व्यवसाय लिनको लागि बी प्लस रेटिङ अनिवार्य छ । नेपाल पुनर्बीमा कम्पनीले यसअघि जारी गरेको आईपिओका लागि रेटिङ गराउँदा बी प्लस रेटिङ प्राप्त गरेको थियो । इक्रा नेपालमा गराएको रेटिङमा बी प्लस रेटिङ पाएको थियो । आईपिओको लागि गराएको रेटिङ सिंगो कम्पनीको लागि मान्य हुँदैन ।
नेपाल पुनर्बीमा कम्पनीले भने सरकारी लगानीको कम्पनी भएकोले रेटिङ भन्दा पनि राज्यको प्रत्याभूति महत्वपूर्ण हुने जनाएको छ । सो कम्पनीको तर्क एउटा हदसम्म मान्न सकिने भएपनि नेपाल पुनर्बीमा कम्पनीमा राज्यको असिमित दायित्व हुँदैन, पुँजि लगानीको सीमासम्म मात्रै दायित्व बहन गर्ने लिमिटेड कम्पनी हो ।
नेपाल पुनर्बीमा कम्पनीले रेटिङ नगराउँदा अन्तर्राष्ट्रिय व्यापारमा प्रत्यक्ष प्रभाव पर्ने बीमा विश्लेषकहरुको भनाई छ । रेटिङ नभएकै कारण अन्तर्राष्ट्रिय बीमक कम्पनीहरुले व्यवसाय पाउन चुनौतिपूर्ण हुने देखिएको छ । यद्यपि नेपाल पुनर्बीमा कम्पनीले विश्वका २८ भन्दा बढि देशबाट बीमा शुल्क आम्दानी गर्दै आएको छ । अन्तर्राष्ट्रिय रेटिङ एजेन्सीबाट राम्रो रेटिङ गराउन सकेमा नेपाल पुनर्बीमा कम्पनीको अन्तर्राष्ट्रिय व्यापार सञ्जाल अझै धेरै फैलिने सम्भावना छ ।
