काठमाडौं । सुदूरपश्चिम प्रदेशमा पहिलो पटक शेयर बजार सम्बन्धी तालिम हुने भएको छ । उक्त प्रदेशका लगानीकर्तालाई शेयर बजारमा आकर्षित गराउन तीन जिल्लामा तालिम संचालन हुन लागेको नेपाल पुँजिबजार लगानीकर्ता संघ सुदूरपश्चिम प्रदेशका संयोजक कुमार थापाले जानकारी दिए ।
नेपाल स्टक एक्सचेन्जको आयोजनामा नेपाल पुँजिबजार लगानीकर्ता संघ र दीपशिखा धितो पत्र कम्पनी प्रालिको सहयोगमा कैलालीको धनगढी, कञ्चनपुरको महेन्द्रनगर र डडेल्धुरामा तालिम सञ्चालन हुने थापाले इन्स्योरेन्स खवरलाई जानकारी दिए ।तालिममा शेयर बजार, शेयर खरिद बिक्रीका प्रक्रिया, स्टक मार्केट, अनलाईन स्टक र स्टक मार्केटमा ईन्ट्री, अनलाईन शेयर कारोबार बारे तालिम दिन लागिएको हो ।
तालिम पछि लगानीकर्ताहरुले शेयर खरिद गर्न दलालको सम्पर्कमा नगई आफै घरबाटै कारोबार गर्न सक्ने लक्ष्य लिइएको छ । शेयर लगानीको बहुआयामिक पाटोबाट लागानीकर्ताहरुलाई जानकारी दिने उदेश्य रहेको नेपाल पुँजिबजार लगानीकर्ता संघ सुदूरपश्चिम प्रदेशका संयोजक थापाले जनाए । सबैलाई निःशुल्क प्रदान गरिने तालिममा स्थानीय जनताको उल्लेखय उपस्थिति रहने विश्वास लिइएको छ ।
