काठमाडौँ । एक हाउजिङ कम्पनीले काठमाडौंमा निर्माण गर्दै गरेको भवन गए रातिको वर्षाले भत्किएको छ । भर्खरै निर्माणको क्रममा रहेको भवन भत्केर पूर्ण रुपमा क्षति पुगेपनि मानिस नबसेको हुँदा मानवीय क्षति भने भएको छैन ।
शेयरवाल सहित साढे तीन तल्ले भवन ठूलो वर्षाका कारण जमिन भासिएर भत्केको छ । ग्रिन हिल सिटीले उक्त भवन कसलाई बिक्री गरेको भन्ने खुल्न सकेको छैन ।
कागेश्वरी मनोहरा नगरपालिका मूलपानीस्थित ग्रीनहिल सिटी हाउजीङको निर्माणाधीन घर भत्किएपछि वरपरका बासिन्दा समेत पहिरो जाने डरले अत्तालिएका छन् । हाउजीङले दिएको जानकारी अनुसार २ बजे उक्त घर भत्किएको छ । निर्माणाधीन घर भएकाले बीमा दावी नपर्ने अनुमान गरिएको छ । यद्यपि उक्त घर निर्माण गर्दा करिब ६० लाख रुपैयाँ लागत लागेको अनुमान गरिएको छ । फिनिसिङ हुँदै गरेको घर भत्केको हो ।
