काठमाडौं ।
शेयर लगानीकर्ताहरुले चर्को विरोध गरिरहेको भारित औषत लागत गणना विधिको त्रुटी सच्याउन अर्थमन्त्रालयले अग्रसरता लिएको छ । सिडिएससीले गणना गर्दा त्रुटीपूर्ण तरिकाले गणना गरेपछि देशैभरिका शेयरलगानीकर्ताहरुले चर्को विरोध गर्दै आन्दोलनमा उत्रिएका थिए । अर्थ मन्त्रालयका सचिव लाल शंकर घिमिरेसँग शेयर लगानीकर्ताहरुले छलफल गरेपछि औषत लागत विधि हटाउने सम्बन्धमा सर्व पक्षिय छलफल गर्ने सहमति भएको छ ।
सोमबार शेयर लगानीकर्ताहरु अर्थमन्त्रालयमा ज्ञापनपत्र बुझाउन पुगेका थिए । लगानीकर्ताहरुसँग गरेको छलफलमा शेयर लगानीकर्ताहरुले उठाएको आवाजको सम्बोधन गर्न आगामी बुधबार नियमनकारी निकाय र सरोकारवालाहरुलाई छलफल कार्यक्रम आयोजना गर्ने भएको छ । शेयर कारोबारमा भारित औसत लागत विधिमा उत्पन्न समस्या अन्त्यका लागि अर्थमन्त्रालयका अधिकारीहरु सकारात्मक देखिएको बैठकमा सहभागी एक शेयरलगानीकर्ताले इन्स्योरेन्स खवरलाई बताए ।
दोस्रो बजारमा खरिद गरिएको शेयर बिक्री गर्दा लाभकर गणनाको विधिको आधारमूल्यका विषयमा आन्तरिक राजश्व, धितोपत्र र शेयर लगानीकर्ताबीच सहमति हुन नसकी विवाद उत्पन्न भएको थियो । सरकारले शेयरलगानीकर्ताहरुलाई पुरानो शेयर खरिदको बिल खोजेर हैरान पारेपछि शेयर लगानीकर्ताहरु आक्रोसित बनेका थिए । सोमबारको छलफलपछि अर्थमन्त्रालयले उक्त समस्या हल गर्ने प्रयास गरेको हो ।
बुधबार ११ बजे अर्थमन्त्रालयमा सरकारी अधिकारी, सरोकारवालाहरुलाई छलफलका लागि बोलाएको नेपाल पुँजि बजार संघकी अध्यक्ष संरक्षणा चौधरीले बताईन् । सोमबार मन्त्रालयमा पुगेका लगानीकर्ताहरुको टोलीसँग अर्थमन्त्रालयका अधिकारीहरुले भारित औषत लागत गणना विधिमा उत्पन्न समस्या हल गर्न सरकार तयार रहेको जानकारी लगानीकर्ताहरुलाई दिएका थिए ।
संघकी अध्यक्ष संरक्षणा चौधरीले बुधबार आन्तरिक राजश्व विभाग, सिडिएससी, सेबोन, ब्रोकर संघ र लगानीकर्ताहरुबीच निर्णायक छलफल हुने जानकारी दिईन् । उनले भनिन्, ‘सोमबारको छलफलमा सर्वपक्षिय छलफलमार्फत औषत भारित गणना विधिको हल निकाल्ने, टुङ्ग्याउनु पर्यो भन्ने विषयमा छलफल भयो । शेयर खरिदको मूल्य स्वघोषणा गर्दा ल्याप्चे लगाउने हटाउने पक्षमा राजश्व सचिवले प्रतिबद्धता व्यक्त गर्नुभएको छ, समस्या हल हुनेछ भन्नेमा विश्वस्त छु ।’
