माथिल्लो तामाकोशी जलविद्युत् आयोजनाले आजदेखि दोलखाबासीलाई साधारण सेयर बिक्री गर्ने भएको छ । लामो विवादपछीआयोजना, स्थानीयबासी र प्रभावित क्षेत्रका जनताबीच सहमति भएपछि सेयर बिक्री गर्न लागिएको हो । आयोजनाले आयोजना प्रभावित जिल्लाका लागि भन्दै आज साउन १६ देखि आगामी भदौ १४ गतेसम्म सेयर खरिद गर्न पाउने गरी आवश्यक व्यवस्था गरेको छ ।
आयोजनाले न्यूनतम ३० कित्ता देखि अधिकतम ३ सय कित्तासम्म आवेदन दिन पाउने व्यवस्था गरेको छ ।कम्पनीले आज दोलखामा एक कार्यक्रमको आयोजना गरी सेयर बिक्रीको कार्यक्रम सुरु गने तयारी गरेका छ ।
सो कार्यक्रमका लागि ऊर्जा, जलस्रोत तथा सिंचाई मन्त्री बर्षमान पुन दोलखा पुग्ने कार्यक्रम रहेको छ ।करिब ९६ प्रतिशत निर्माण सम्पन्न भएको कूल ४५६ मेगावाट क्षमताको सो आयोजनाले दोलखाबासीलाई १ अर्ब ५ करोड ९० लाख रुपैयाँ बराबरको साधारण सेयर बिक्री गर्ने छ । कूल लगानीको १० प्रतिशतले हुन आउने १ करोड ५ लाख ९० हजार कित्ता सेयर बिक्री गर्न लागिएको हो ।
दोलखाका विभिन्न बैंक तथा वित्तीय संस्थाको २१ स्थानबाट सेयर आवेदन लिने व्यवस्था
मिलाएको छ ।बैंक तथा वित्तीय संख्याका शाखा नभएका स्थानमा घुम्ती संकलन केन्द्र राखिएको र स्वयमसेवी समेत परिचालन गरिएको छ । दोलखालीलाई सेयर आवेदन गर्न डिम्याट खाता नभएपनि हुने व्यवस्था गरिएको छ ।वैदेशिक रोगजारीमा गएका दोलखालीको हकमा वेबसाइटबाट फारम डाउनलोड गरेर हस्ताक्षर गरेर पठाएमा उनीहरुका परिवारका सदस्यले आवेदन दिन मिल्ने व्यवस्था मिलाइएको छ ।यस्तै काठमाडौं उपत्यकामा बस्दै आएका दोलखालीलाई पनि सेयर आवेदन दिन सक्ने गरी व्यवस्था मिलाइएको छ ।
काठमाडौँ उपत्यकमा रहेका दोलखाबासीलाई सनराइज बैंकका शाखाबाट आवेदन दिने व्यवस्था मिलाइएको छ ।
कम्पनीले आयोजनाबाट अतिप्रभावित, कमप्रभावित र प्रभावित गरी ३ तहमा वर्गीकरण गरेको छ ।आयोजना अति प्रभावित तत्कालीन लामाबगर र गौरीशंकर गापिसका आवेदकले हरियो रंगको आवेदन फारम फारम भर्ने व्यवस्था मिलाइएको छ ।यस्तै सडक र प्रसारण लाइनले छोएको क्षेत्रका प्रभावित स्थानीयले निलो रंगको आवेदन फारम भर्नेछन् भने कम प्रभावित अरु क्षेत्रका लागि कालो रंगको आवेदन फारम तयार पारिएको छ ।सेयर निष्कासन तथा बिक्री प्रबन्धक नागरिक लगानी कोष र सनराइज क्यापिटलले आवश्यक व्यवस्था मिलाइसकिएको जनाएको छ ।
सर्वसाधारणलाई १ अर्ब ५८ करोड ८५ लाख बराबरको १ करोड ५८ लाख ८५ हजार कित्ता साधारण सेयर बिक्री गर्ने तयारी गरिएको छ ।सर्वसाधारणले न्युनतम ५० देखि अधिकतम १ हजार कित्तासम्म सेयर खरिद गर्न पाउने व्यवस्था मिलाइएको छ ।स्थानीय र सर्वसाधारणलाई सेयर बिक्री गरेर २ अर्ब ६४ करोड ७५ लाख रुपैयाँ संकलन गर्ने तयारी गरिएको छ । तर तामाकोशीले गत महिना प्रकाशित गरेको आह्वानपत्रलाई मान्ने हो भने तामाकोशीको सेयरबाट तत्काल फाइदा हुने अवस्था रहेको छैन ।
कूल लागत ३५ अर्ब रहेकोमा पछिल्लो दिनमा लागत बढेर ७० अर्ब पुग्ने क्रममा रहेको छ । आगामी पुसमा निर्माण सम्पन्न गर्ने भनिएपनि आयोजना सम्पन्न हुन अझै एक वर्षको हाराहारीमा लाग्ने देखिएको छ ।सिंगटी लामो साघु सडक खण्डका कारण निर्माण सामग्री आयात गर्न समस्या परेको भन्दै भारतीय ठेकेदार कम्पनीले जानी बुझीकन आयोजनामा ढिलाई गरिरहेको स्थानियको गुनासो रहेको छ ।
