काठमाडौँ । ज्योति लाइफ इन्स्योरेन्सले प्राथमिक सेयर (आईपीओ) निष्काशनको प्रकृया अघि बढाएको छ । एक महिना पहिले साधारण सभाबाट पारित गरेकोसाधारण सेयर निष्काशनको प्रक्रिया अगाडी बढाउन कम्पनीले बिक्री प्रबन्धक नियुक्त गरेको छ । कम्पनीका अनुसार कम्पनीले आफ्नो जारी पुजीको ३० % बराबर को ६६ करोड रुपैयाँ बराबरको ६६ लाख कित्ता साधारण सेयर निष्काशनका लागि एनएमबी क्यापिटललाई सेयर निष्काशन तथा बिक्री प्रबन्धक नियुक्त गरिएको छ ।
इन्स्योरेन्सका अनुसार साधारण सेयर निष्काशनका लागि बिक्री प्रबन्धक नियुक्त गर्ने सम्बन्धमा बुधबार सम्झौता भएको छ । सम्झौता पत्रमा इन्स्योरेन्सका प्रमुख कार्यकारी अधिकृत प्रकाश बिक्रम खत्री तथा क्यापिटलका प्रमुख कार्यकारी अधिकृत श्रीजेश घिमिरेले हस्ताक्षर गरेका छन् ।
आइपिओ निष्कासन पश्चात कम्पनीको चुक्ता पूँजी दुई अर्ब रुपैयाँ पुग्नेछ । कम्पनीले संस्थापकबाट ७० प्रतिशत हुने रकम १ अर्ब ५४ करोड रुपैयाँ पूँजी कायम गरिसकेको छ । आइपिओ जारी गरेपछि कम्पनीमा संस्थापकको हिस्सा ७० प्रतिशत तथा साधारण लगानीकर्ताको ३० प्रतिशत हुनेछ । ज्योती लाइफको अध्यक्षमा नेपाल उद्योग बाणिज्य महासंघका निवर्तमान अध्यक्ष पशुपति मुरारका छन् ।
गत बैशाख १४ गते कम्पनी रजिष्ट्रार कार्यलयमा दर्ता भएको ज्योति लाईफले असार २० गते बीमा समितिबाट सञ्चालन इजाजतपत्र पाएको थियो । त्यस्तै भदौ १९ गते कारोबारको अन्तिम स्वीकृति लिएको कम्पनी असोज ८ गतेदेखि औपचारिक रुपमा सञ्चालनमा आएको थियो ।
ज्योती लाइफले जीवन बीमा सुरु गरेपछि पौष मसान्त सम्म करोड २ लाख रुपैयाँ खुद नाफा गरेको छ। कम्पनीले ८६२ बीमा लेख बिक्री गरी तीन करोड २ लाख रुपैयाँ आम्दानी गरेको छ। कम्पनीले कर्जा सापटीबाट ९ करोड ७४ लाख रुपैयाँ आम्दानी गरेको छ भने जगेडा कोषमा ८ करोड ९९ लाख रुपैयाँ जम्मा भएको छ।
