काठमाडौं । सन् २०२६ मा बढ्दो चिकित्सा लागतले एसियाभरका रोजगारदातालाई स्वास्थ्य बीमा रणनीति समायोजन गर्न बाध्य पारिरहेको छ।
हाउडेनको ‘ग्लोबल इम्प्लोई हेल्थ’ प्रतिवेदनको एउटा एसिया इम्प्लोई हेल्थ इन्फोग्राफिक र इनसाइट्सले यस्तो देखाएको हो। ‘यस क्षेत्रमा चिकित्सा लागत सामान्य मुद्रास्फीतिभन्दा बढी हुने अपेक्षा गरिएको छ’, इनसाइट्समा भनिएको छ, ‘यसले रोजगारदाता प्रायोजित स्वास्थ्य योजनाहरुमा दबाब सिर्जना गरेको छ।’
एसियाका आधाभन्दा बढी रोजगारदाता वा ५१ प्रतिशतले यस वर्ष चिकित्सा खर्च उल्लेखनीय रुपमा बढ्ने अपेक्षा गरेका छन्। जुन विश्वव्यापी औसत ४१ प्रतिशत हो।
प्रतिवेदन तयार गर्ने क्रममा लिइएको प्रतिक्रियामा ५० प्रतिशत रोजगारदाताले विगत १२ महिनामा लागत साझेदारी बढाएको जानकारी दिएका छन्। धेरैले योजना डिजाइनको समीक्षा पनि गरिरहेका छन्, लचिलो लाभहरु बढाइरहेका छन् र बीमा दाबी लागत व्यवस्थापन गर्न निवारक हेरचाहमा बढी ध्यान केन्द्रित गरिरहेका छन्।
एसियामा बीमा कम्पनीहरुले क्यान्सर, हृदय रोग, मस्कुलोस्केलेटल अवस्था र मधुमेह वा अन्य अवस्था सन् २०२६ मा चिकित्सा योजना लागतको प्रमुख चालक हुने अपेक्षा गरेका छन्। रोजगारदाताहरुले मानसिक स्वास्थ्य, हृदय रोग र उच्च रक्तचापलाई पनि प्रमुख लागत दबाबका रुपमा पहिचान गरेका छन्। जोखिम एजेन्डामा मोटोपनसँग सम्बन्धित अवस्थाहरु बढ्दै गइरहेका छन्। जसमा ओजेम्पिकजस्ता जीएलपी–१ औषधिहरुको दाबीमा प्रभाव समावेश छ।
गत वर्ष एसियाका ४३ प्रतिशत कर्मचारीले आफ्नो सबैभन्दा गम्भीर चिकित्सा उपचारका लागि निजी स्वास्थ्य सेवामात्र प्रयोग गरेका थिए र ५४ प्रतिशतले रोजगारदाताले प्रदान गरेको निजी बीमाले त्यो उपचारको सम्पूर्ण लागत कभर गरेको बताए। स्वास्थ्य लाभहरु कार्यबल अवधारणसँग नजिकबाट जोडिएका छन्।
एसियाका लगभग आधा कर्मचारी वा ४८ प्रतिशतले नयाँ जागिर खोज्दा स्वास्थ्य लाभहरुले उनीहरुको निर्णयलाई प्रभाव पार्ने उल्लेख गरेका छन्। लगभग ७० प्रतिशतका अनुसार उनीहरु राम्रो स्वास्थ्य लाभ प्रदान गर्ने रोजगारदातासँग बस्ने सम्भावना बढी हुन्छ। जुन विश्वव्यापी रुपमा ६० प्रतिशत रहेको छ।
मानसिक स्वास्थ्यलाई रोजगारदाता स्वास्थ्य योजनाहरुका लागि प्रमुख लागत चालकका रुपमा पहिचान गरिएको छ। विगत १२ महिनामा प्रायः औषधि वा समूह थेरापीमार्फत ३८ प्रतिशत कर्मचारीले मानसिक स्वास्थ्यका लागि उपचार प्राप्त गरे भने २८ प्रतिशतले यो समर्थन प्राप्त गर्न आफ्नो कर्मचारी स्वास्थ्य लाभ वा चिकित्सा बीमा प्रयोग गरे।
रोजगारदाताहरुले कर्मचारी सहायता कार्यक्रम, साथी समर्थन र डिजिटल मानसिक स्वास्थ्य प्लेटफर्मजस्ता सेवाहरु थपेको प्रतिक्रिया दिइरहेका छन्। यद्यपि १८ प्रतिशत कर्मचारीले गोपनीयता, करिअर प्रभाव र कलंकको चिन्ताका कारण मानसिक स्वास्थ्यका लागि रोजगारदाताले प्रदान गरेको स्वास्थ्य सेवा प्रयोग गर्न असहज महसुस गर्ने बताएका छन्।
प्रतिवेदनले स्वास्थ्य सेवा वितरणमा कृत्रिम बुद्धिमत्ता (एआई) को बढ्दो भूमिकालाई पनि औँल्याएको छ। लगभग ६४ प्रतिशत कर्मचारीले आफ्नो स्वास्थ्य सेवा यात्रामा एआईमा विश्वास गर्ने बताएका छन् र ३८ प्रतिशतले उपचार योजना, रिमोट निगरानी, टेलिहेल्थ र प्रशासनसहित यसको प्रयोग पहिले नै अनुभव गरिसकेको प्रतिक्रिया दिएका छन्। –एजेन्सी
