काठमाडौं । स्वास्थ्य तथा जनसंख्यामन्त्री प्रदीप पौडेलले अहिलेकै ऐन–नियमले स्वास्थ्य बीमा कार्यक्रम व्यवस्थित हुन नसक्ने बताएका छन्।
प्रतिनिधिसभा बैठकमा सोमबार सांसद प्रेम सुवालले गरेको प्रश्नको जबाफमा मन्त्री पौडेलले यस्तो धारणा राखेका हुन्। उनले स्वास्थ्य बीमा कार्यक्रमलाई प्रभावकारी बनाउन विद्यमान ऐनमै परिवर्तन गर्न आवश्यक रहेको औंल्याए। ‘स्वास्थ्य उपचारमा सहज बनाउनका लागि आमनागरिकलाई स्वास्थ्य बीमा कार्यक्रममा समेट्न सरकारले छुट्टै अध्ययन समिति बनाउने तयारी गरिरहेको छ’, उनले भने, ‘बीमासम्बन्धी ऐन र नीति–नियम परिवर्तन गरी यसलाई थप व्यवस्थित बनाउन जरुरी छ।’
मन्त्री पौडेलले स्वास्थ्य बीमा कार्यक्रमको दायरा फराकिलो बनाउन, संगठित सबै क्षेत्रलाई बीमासँग आबद्ध गर्न र त्यसका लागि स्रोत सुनिश्चित गर्न सरकारले पहल गरिरहेको बताए। ‘यसका लागि गृहकार्य भइरहेको छ’, उनले भने, ‘स्वास्थ्य बीमा बोर्ड र मन्त्रालयबीच छलफल भइरहेको छ।’
