काठमाडौं । भारतको सबैभन्दा ठूलो जीवन बीमा कम्पनी एलआईसी अब स्वास्थ्य बीमा क्षेत्रमा प्रवेश गर्ने तयारीमा लागेको छ। यसका लागि सरकारी बीमा कम्पनीले यस क्षेत्रमा काम गरिरहेको अन्य कम्पनीलाई प्राप्ति गर्ने सम्भावना पनि खोजिरहेको छ। कम्पोजिट बीमा कम्पनीलाई स्वीकृत गर्ने प्रस्तावका बीच एलआईसीले पनि स्वास्थ्य बीमा क्षेत्रमा प्रवेश गर्ने तयारी गरेको हो।
एलआईसीका अध्यक्ष सिद्धार्थ मोहन्तीले कम्पोजिट लाइसेन्स स्वीकृत हुनेमा आशावादी रहेको र ग्राउन्ड लेभलमा पनि केही काम गरिसकेको बताए। ‘हामी स्वास्थ्य बीमामा हाम्रो चासो बढाउँदैछौँ र विकासका विभिन्न अवसर पनि विचार गरिरहेका छौँ’, उनले भने।
हाल जीवन बीमा कम्पनीहरुले स्वास्थ्य बीमाअन्तर्गत दीर्घकालीन लाभमात्रै प्रदान गर्न सक्छन् र उनीहरुलाई अस्पतालमा भर्ना वा अन्य कुनै पनि प्रकारको क्षतिपूर्ति कभर प्रदान गर्न बीमा ऐन संशोधन गर्न आवश्यक छ। यसका लागि भारतको संसदीय समितिले बीमा कम्पनीको खर्च र कम्प्लायन्सको भार कम गर्न कम्पोजिट बीमा लाइसेन्स ल्याउन सुझाव दिएको थियो।
वित्त वर्ष २०२२।२३ को अन्त्यमा २.३ करोडभन्दा कम स्वास्थ्य बीमा कभर जारी गरिएको थियो। जसले ५५ करोड मानिसलाई कभर गर्दछ। सरकार र बीमा नियामक आईआरडीएआईले थप स्वास्थ्य कभर जारी गर्नुपर्छ भन्ने विश्वास गर्छन्। स्वास्थ्य बीमा क्षेत्रमा एलआईसीको प्रवेशसँगै यसले गति लिने अपेक्षा गरिएको छ। एलआईसीले अब स्वास्थ्य बीमा क्षेत्रमा प्रवेश गर्ने तयारी गरेको यो एउटा ठूलो कारण हो। –एजेन्सी
