काठमाडाैं। विश्वव्यापी रेटिङ एजेन्सीले विश्वका ठूला पुनर्बीमकहरूले मध्यम आकारको महाविपत्ती प्राकृतिक प्रकोप जोखिमहरूको लागि जाेखिम बहन घटाउँदै लगेकाे प्रतिवेदन सार्वजनिक गरेकाे छ।
फिचका अनुसार यो परिवर्तन मुख्यतया केही वर्षयताकाे ठूला विनाशकारी महाविपत्तीबाट सिर्जित घाटा र बजारका अन्य क्षेत्रमा सुधारिएको नाफा पछि लगानीकर्ताको दबाबको कारण हो। सबैभन्दा बलियो पुनर्बीमकहरूले पनि आफ्नो मध्यमस्तरका विपत्तीविरुद्धकाे जाेखिम बहनमा आफ्नाे संलग्नतालाई कम गरेका छन् ।
फिचका अनुसार पुनर्बीमकहरुले अझै पनि गम्भीर महाविपत्तीको लागि पर्याप्त जाेखिम प्रस्ताव गरिरहेका छन् । पुनर्बीमा बजारको हालैको विकासले यसको पूर्व-नरम बजार स्थितिमा फर्किने सङ्केत गरेकाे छ, जहाँ आम्दानीको सुरक्षाको सट्टा बीमकका लागि पूँजी सुरक्षा प्रदान गर्ने विषयमा ध्यान केन्द्रित गरिएको छ।
बढ्दो महाविपत्तीका घटनाहरु र जलवायु परिवर्तनको कारणले हुने मौसम-सम्बन्धित नाेक्सानी चुलिएकाले प्राकृतिक प्रकोप विपत्तीविरुद्धकाे सुरक्षण पुनर्बीमा हालका वर्षहरूमा नाेक्सानमुखी साबित भएको छ। यसले महाविपत्ती र प्राकृतिक प्रकोपविरुद्ध पुनर्बीमा सुरक्षा प्रदान गर्न पुनर्बीमककाे इच्छुकतालाई उल्लेखनीय रूपमा घटाएको छ।
पुनर्बीमा कम्पनी एओनका अनुसार, २०२३ को पहिलो छ महिनामा बीमाकृत प्राकृतिक प्रकोपको लागत विश्वव्यापी रूपमा ५३ अर्ब अमेरिकी डलर पुगेको छ, जुन २० वर्षको औसतभन्दा ४७ प्रतिशतले बढी हो। यसका बावजुद, फिचद्वारा अनुगमन गरिएका १८ निर्जीवन पुनर्बीमकहरूले सोही अवधिमा ८८ प्रतिशतको समग्र पुनर्बीमा संयुक्त अनुपातको साथ बलियो अन्डरराइटिङ नाफा रिपोर्ट गरेका छन्। यो सकारात्मक नतिजा धेरै व्यापार लाइनहरूमा वृद्धि गरिएकाे पुनर्बीमा शुल्कद्वारा संचालित भएको थियो ।
फिचले उच्च ब्याज दरको बावजुद विश्वव्यापी पुनर्बीमकहरूले बलियो अन्डरराइटिङ अनुशासन कायम राख्ने अपेक्षा गरेकाे छ। पुनर्बीमा बजारको कडाइ सन् २०२४ सम्म जारी रहने अनुमान गरेकाे छ।
