काठमाण्डाै । स्वास्थ्य मन्त्री पदम गिरीकाे दबाब पछि बीमा बाेर्डकाे अध्यक्ष पदबाट डा. सेनेन्द्र राज उप्रेतीले पदबाट राजीनामा दिएका छन् । उनले स्वास्थ्य मन्त्रालयमा मंगलबार स्वास्थ्यमन्त्री गिरी समक्ष राजीनामा दिएका हुन् ।
२०७७ साउन २० गते अध्यक्ष नियुक्त डा. उप्रेतीले कार्यकाल पुरा नहुँदै राजीनामा दिन बाध्य भएका हुन् । उप्रेती पूर्व स्वास्थ्य सचिव समेत हुन् । उप्रेतीले सरकारी निकायकाे असहयाेगका कारण आफ्नाे कार्यकालमा बाेर्डले अपेक्षितरुपमा काम गर्न नसकेकाे प्रतिकृया संचारकर्मीलाई दिएका छन् ।
पदभार ग्रहण लगत्तै नवनियुक्त स्वास्थ्य मन्त्री गिरीले स्वास्थ्य बीमा कार्यक्रमकाे प्रभावकारीतासँग आफू सन्तुष्ट नरहेकाे प्रतिकृया दिएका थिए । उनले स्वास्थ्य बीमामा सहभागी भइसकेका नागरिकको नविकरण नहुने, सहभागीकाे संख्या घट्दै जाने अनेकौं समस्याहरु देखिएकोमा असन्तुष्टी व्यक्त गरेका थिए । यसको प्रमुख कारण के हो, यसका अप्ठ्यारो र समस्या कहाँनेर परेको हो त्यतातर्फ गम्भिरताका साथ हेरिने र यसलाई अझै फराकिलो बनाएर लैजाने उनले प्रतिवद्धता व्यक्त गरेका थिए । सबै नागरिकले स्वास्थ्य सेवा पाउने सुनिश्चिता गर्ने उनको अठोट छ ।
नेपाल सरकारले स्वास्थ्य सेवामा आम नागरिककाे सहज पहुँच बिस्तार गर्ने उद्देश्यले २०७२ सालदेखि बाेर्ड मार्फत् सामाजिक सुरक्षा कार्यक्रम अन्तर्गत स्वास्थ्य बीमा कार्यक्रम संचालन गर्दै आएकाे छ । देशकाे सबै जिल्लामा याे कार्यक्रम बिस्तार भएपनि सर्वसाधारणले अपेक्षित लाभ प्राप्त गर्न सकेका छैनन् । बीमा कार्यक्रमले घाेषणा गरे अनुसार अस्पतालहरुबाट सहजरुपमा उपचार सेवा र औषधी उपलब्ध नहुने र उपचारका लागी रसिद काट्न घण्टाैं लाम लाग्नुपर्ने बाध्यताका कारण बीमितहरूकाे आकर्षण घट्दै गएकाे छ।
