काठमाडौं । एनआईसी एशिया क्यापिटल लिमिटेडको व्यवस्थापनमा सञ्चालित दुई योजना एनआईसी एशिया ग्रोथ फण्ड र दोस्रो बन्दमुखी योजना एनआईसी एशिया ब्यालेन्स्ड फण्डले लाभांश वितरण गरेका हुन् । दुवै योजनाले गत आर्थिक वर्ष ०७८/७९ को मुनाफाबाट एउटै अनुपातमा करसमेत १३ प्रतिशत नगद लाभांश वितरण गरेका हुन् ।
लाभांश प्रयोजनका लागि दुवै योजनाले कात्तिक १५ गते एक दिन बुक क्लोज गरेका थिए । बुक क्लोजको आधारमा कात्तिक १४ गतेसम्म कायम दुव योजनाका इकाईधनीहरूको बैंक खातामै मंसिर २ गतेदेखि रकम जम्मा गर्न शरू गरिएको क्यापिटलले जनाएको छ ।
हालसम्म पनि हितग्राही खातामा बैंक खाता नम्बर अद्यावधिक नगराएका इकाईधनीहरूलाई यथाशीघ्र अद्यावधिक गराउन योजना व्यवस्थापकले आग्रह गरेको छ ।
आफ्नो इकाई धितो राखेका इकाईधनीहरूको लाभांश सम्बन्धित बैंक तथा वित्तीय संस्थाको स्वीकृतिपत्र पेश गरेपछि मात्र नगद लाभांश जम्मा गरिने योजना व्यवस्थापकले जनाएको छ ।
