काठमाडौं । स्वास्थ्य बीमा बोर्डले स्वास्थ्य बीमा योजना अन्तर्गत बीमितलाई उपचार सेवा प्रदान गरिरहेका सूचीकृत स्वास्थ्य संस्थाहरुलाई अझै १ अर्ब ५० करोड रुपैयाँभन्दा बढी रकम भुक्तानी गर्न बाँकी रहेको छ । सरकारले पर्याप्त रकम निकासा नगरेको र सीमित जनशक्तिको भरमा भुक्तानी फछ्र्यौट गर्नुपर्ने बाध्यताका कारण लामो समयदेखि भुक्तानी फछ्र्यौट गर्न नसकेको बोर्डले अहिले पुराना बक्यौताहरु टुंग्याउँदै लगेको छ ।
बोर्डले गत भदौ यता स्वास्थ्य संस्थाहरुलाई पूर्ण र आंशिक दाबी वापत ३ अर्ब ३३ करोड रुपैयाँ भुक्तानी गरेको छ । बोर्डले सातवटै प्रदेश अन्तर्गतको कूल ३ सय ४३ वटा स्वास्थ्य सेवा प्रदायक संस्थालाई असोज १४ गतेको बोर्ड संचालक समितिको निर्णय अनुसार ६६ करोड ८१ लाख रुपैयाँ दाबी भुक्तानी गरेको छ ।
बोर्डले लामो समयदेखि भुक्तानी फछ्र्यौट नगरेको भन्दै देशभरका ठूला अस्पतालले बीमा योजना अन्तर्गतको उपचार सेवा ठप्प पार्ने चेतावनी दिएपछि बोर्डले भुक्तानी फछ्र्यौटको लागी चासो देखाएको हो ।
