काठमाडौं । स्वास्थ्य सेवा उपयोगको क्रममा हुने अनियोजित खर्चको जोखिमलाई अग्रीम व्यवस्थापन गर्दै बित्तीय संरक्षण प्रदान गर्नु स्वास्थ्य बीमा हो । सम्पूर्ण नागरिकले सर्वसुलभ रुपमा गुणस्तरीय स्वास्थ्य सेवा प्रदान गर्न र स्वास्थ्य सेवाको उपभोगमा सुधार ल्याउन सुचारु गरिएको यो सेवा स्वास्थ्य बीमा बोर्डद्धारा सञ्चालित छ ।
केहि वर्ष यता नेपालमा भने स्वास्थ्य बीमा केन्द्र, प्रदेश र स्थानिय सरकारको एजेन्डाकै रुपमा स्थापित भएको छ । जसले आर्थिक अवस्था कमजोर भएकै कारण स्वास्थ्य उपचारबाट बञ्चित हुनुपर्ने बाध्यता घट्दै गएको छ । बोर्डले देशभरका विभिन्न स्वास्थ्य संस्थाबाट स्वास्थ्य बीमा सेवा प्रदान गर्दै आइरहेको छ । स्वास्थ्य बीमा अन्तर्गत बोर्डले तोकेको स्वास्थ्य संस्थाबाट ओपिडी सेवा, इमर्जेन्सी, ल्याब उपचार, सामान्य अपरेशन लगाएतका उपचार सेवा प्राप्त गर्न सकिन्छ । साथै सरकारले तोकेको निशुल्क औषधि समेत प्राप्त गर्न सकिन्छ ।
यसका अलाबा सरकारले हालसालै स्वास्थ्य बीमा अन्तर्गत आयुर्वेदिक औषधि सेवालाई पनि संलग्न गरेको छ । जसमा विभिन्न २५ प्रकारका आयुर्वेदिक औषधिहरु संलग्न रहेको छ ।
