काठमाडौं । स्वास्थ्य तथा जनसंख्यामन्त्री विरोध खतिवडाले सामाजिक सुरक्षा कार्यक्रम अन्तर्गत सरकारले संचालन गरिरहेको स्वास्थ्य बिमा कार्यक्रम निजी क्षेत्रको बीमा कम्पनीलाई जिम्मा नलगाइने बताएका छन् ।
स्वास्थ्य मन्त्री खतिवडाले प्रतिनिधिसभाको बुधबारको बैठकमा गैर नाफामूलक कार्यक्रमको रुपमा लागू गरिएको स्वास्थ्य बीमा कार्यक्रम नाफामूल निजी बीमा कम्पनीहरुको जिम्मा नलगाइने जवाफ दिएका हुन् ।
अर्थमन्त्री जनार्दन शर्माले आगामी आर्थिक वर्षको बजेट वक्तव्यमा स्वास्थ्य सेवा बीमा कार्यक्रम बिस्तार गर्नको लागी निजी क्षेत्रलाई समावेश गर्ने घोषणा गरेका थिए । तर प्रतिनिधि सभाको बैठकमा यसको विरोध गरेपछि मन्त्री शर्माले सरकारको त्यस्तो उद्देश्य नरहेको भन्दै स्पष्टीकरण दिने प्रयास गरेका थिए ।
प्रतिनिधि सभा बैठकमा स्वास्थ्य मन्त्री खतिवडाले भने, अर्थमन्त्रीले के भन्छन्,(मलाई) जानकारी छैन, तर सरकारले संचालन गरिरहेको स्वास्थ्य बिमा निजी कम्पनीलाई दिंदैनौं ।
