काठमाण्डौं । निजी क्षेत्रको पहिलो पूनर्बीमा कम्पनीको रुपमा दुई महिना अघि संचालनमा आएको हिमालयन रिइन्स्योरेन्स लिमिटेडले क्रेडिट रेटिङ गराउने प्रक्रिया शुरु गरेको छ । अन्तर्राष्ट्रिय रेटिङ एजेन्सी एएम वेष्टबाट हिमालयन रि इन्स्योरेन्सले क्रेडिट रेटिङ गराउने तयारी गरेको हो । रेटिङको काम बढीमा ६ महिनाभित्र सम्पन्न हुने सम्बद्ध श्रोतले जानकारी दिएको छ ।
कुनै पनि कम्पनी वित्तीय र व्यवस्थापकीय रुपमा कतिको सक्षम छ भन्ने अनुमान गर्नको लागी क्रेडिट रेटिङ एउटा औजार हो । निजी क्षेत्रबाट प्रवद्र्धित नयाँ कम्पनी भएकोले अन्तर्राष्ट्रिय बजारमा विश्वसनियताको लागी क्रेडिट रेटिङ एउटा आधार हुनेछ । नेपाली बीमा कम्पनीहरुबाट प्राप्त हुने व्यवसायबाट मात्र पूनर्बीमा कम्पनी पूर्ण क्षमतामा संचालन हुन नसक्ने भएकोले हिमालयन रिको लागी क्रेडिट रेटिङ आवश्यक छ ।
हिमालयन रिइन्स्योरेन्स कम्पनी गत साउनबाट राष्ट्रिय वाणिज्य बैंक र नेपाल बैंक लिमिटेड समेतको प्रवद्र्धनमा रु.२१ अर्ब अधिकृत पूँजी रु.७ अर्ब जारी पूँजी सहित संचालनमा आएको हो ।
क्रेडिट रेटिङ गराउन कति खर्च लाग्छ ?
विश्वकै एक नम्बर क्रेडिट रेटिङ एजेन्सी फिच रेटिङले सार्वजनिक गरेको जानकारी अनुसार रेटिङ शुल्क १ हजार देखि १५ लाख अमेरिकी डलर सम्म अर्थात नेपाली मुद्रामा रु.१ लाख १८ हजारदेखि १७ करोड रुपैयाँ पर्छ । अर्थ मन्त्रालयले नेपालको क्रेडिट रेटिङ गर्नको लागी बेलायती–अमेरिकी कम्पनी फिच रेटिङलाई नै जिम्मा दिएको छ ।
कुनै पनि कम्पनीको वित्तीय जोखिम बहन क्षमता, पूँजीकोष, वित्तीय क्षमता, व्यवस्थापकीय कुशलता, व्यवसायीक रणनीतिलगायत विभिन्न सूचकको आधारमा क्रेडिट रेटिङ कम्पनीले वर्गिकरण गर्छन् ।
