काठमाडौं । नयाँ पुनर्बीमा कम्पनी हिमालयन रि-इन्स्योरेन्सको संस्थापक शेयरधनीहरुमा ४४ वटा प्राइभेट फर्म तथा कम्पनी सहित १०६ जनाको लगानी रहेको छ । केहि सिमित व्यक्तिले आफ्ना भएजति सबै प्राइभेट फर्म मार्फत लगानी गरेको देखिन्छ ।
मारवाडी समुदायको प्रमुख लगानी रहेको यस कम्पनीमा उनीहरुले आफ्ना प्राइभेट फर्म तथा संस्थालाई अगाडि सारेका हुन् । बीमा समितिले व्यक्ति भन्दा पनि संस्थागत लगानीकर्तालाई प्राथमिकता दिने बताउदै गर्दा हिमालयनले व्यवसायीको प्राइभेट फर्मलाई प्रमुख शेयरधनी बनाएको देखिन्छ ।
संस्थापक अध्यक्ष शेखर गोल्छाको पनि व्यक्तिगत रुपमा लगानी छैन तर उनको हंशराज हुलास चन्द एण्ड कम्पनी प्रा.लीको तर्फबाट भने २० करोड रुपैयाँ लगानी रहेको छ । अहिलेको सात अर्बको पूँजीका आधारमा यस कम्पनीको हिस्सा २.८ प्रतिशत पर्न आउछ ।
अध्यक्ष गोल्छा सहित सञ्चालकहरुमा साहिल अग्रवाल, अमित मोर र रोहित गुप्ता छन् । कम्पनीको प्रमुख शेयरधनी तथा सञ्चालक साहिल अग्रवालले आफ्ना १० वटा प्राइभेट फर्म मार्फत डेड अर्ब रुपैयाँको लगानी गरेका छन् । तर व्यक्तिगत रुपमा साहिलको एक रुपैयाँ पनि लगानी छैन । उनले जगदम्वा स्टिल प्रा.लीको तर्फबाट २२ करोड, जगदम्वा मोटर्सको तर्फबाट ३२ करोड, किर्ती एपेक्सको, बंडर भेन्चर्स, उज्जीवन मर्चेन्ट, अजन्ता होल्डिङको तर्फबाट १०/१० करोड, कारवी ग्लोबल, अटल क्यापिटल, एकाँर्ड क्यापफिन र कालिका फिनकोर्फको तर्फबाट १३.५०/१३.३० करोड रुपैयाँ लगानी रहेको छ । तर उनको व्यक्तिगत तर्फबाट भने लगानी देखिदैन ।
अर्को सञ्चालक अमित मोर नेपाल उद्योग परिसंघका अध्यक्ष शतिश मोरका छोरा हुन । हिमालयनमा शतिश मोरको गणपति वनस्पति प्रालीको तर्फबाट २२ करोड ५० लाख रुपैयाँ लगानी रहेको छ । अमित मोरको नाममा भने २ करोड ५० लाख रुपैयाँको शेयर रहेको छ । सञ्चालक रोहित गुप्ता भने उद्योगी रमेश गुप्ताका छोरा हुन् ।
रोहित गुप्ताले पनि टेलिडाइरेक्ट प्रा.लीको तर्फबाट ५ करोड, लुम्बिनी विद्युत उद्योगको तर्फबाट २ करोड, टेलिकम प्रालीको तर्फबाट २ करोड, युनिभर्सल इलेक्ट्रोकम प्रा.लीको तर्फबाट एक करोड रुपैयाँ लगानी रहेको छ ।
कम्पनीले प्रमुख कार्यकारी अधिकृत भने भारतबाट ल्याउने तयारी गरेको छ । बालुवाटारमा केन्द्रिय कार्यालय स्थापना गरेको हिमालयनले यहि असार भित्रै व्यवसाय शुभारम्भ सहित उद्घटन गर्ने तयारी गरेको छ । कम्पनीलाई बीमा समितिले ४५ दिन भित्र पूँजी जुटाउन निर्देशन दिए पनि यहि असार भित्रै जुटाएर व्यवसाय शुभारम्भ गर्ने तयारी गरेको हो ।
बीमा समितिले कम्पनीलाई जेठ १७ गते लाइसेन्स दिएको थियो । समितिमा ५ वटाको प्रस्ताव परेकोमा हिमालयनले बाजी मारेको हो । मारवाणी समुदायका व्यवसायी तथा सरकार निकट केहि व्यवसायीका कारण कम्पनीले लाइसेन्स पाउन सफल भएको हो ।
दुई सरकारी बैंक नेपाल बैंक र राष्ट्रिय बाणिज्य बैंकलाई एक अर्बको शेयर दिएका छन् । यस बाहेक इन्फिनिटी होल्डिङ्स प्रालिको तर्फबाट प्रधानमन्त्री निकट व्यवसायी दिपक भट्टको ४५ करोडको लगानी रहेको छ । त्यस्तै सेफ्रन सिके इनभेष्टमेन्टको तर्फबाट प्रकाश पौडेलको २० करोडको लगानी रहेको छ ।
