काठमाडौं/ नेपाल धितोपत्र बोर्ड (सेबोन) बाट ‘वेल्थ म्यानेजमेण्ट एण्ड मर्चेण्ट बैंक’लाई ब्यवसाय सञ्चालन गर्ने अनुमति दिएको छ । दुई वर्षदेखि सञ्चालन अनुमतिको प्रक्रीया सुरु गरेको कम्पनीले सोमवार सेबोनबाट प्रमाणपत्र पाएको हो ।
‘हामीले कानूनी रुपमा बाधा नपर्ने कतिपय कामहरु पहिलेदेखि नै गर्दै आएका थियौं,’ कम्पनीका एक जना सञ्चालक पुरुषोत्तमराज चिमौरियाले भने, ‘अब मर्चेण्ट बैंकका सबै काम गर्न बाटो खुलेको छ ।’
कम्पनीले दुई वर्षअघि नै काठमाडौंमा मैतिदेवी कम्प्लेक्समा कार्यालय स्थापना गरेर लगानी ब्यवस्थापनका काम सुरु गरेको थियो । कम्पनीले ५ करोड रुपैयाँ चुक्ता पूँजीमा व्यवसाय सञ्चालन गर्ने अनुमति पाएको हो ।
विगतमा सेयर बजारको लामो अनुभव संगालेका व्यक्तीहरु मिलेर लगानी व्यवस्थापन कम्पनी खोलेको सञ्चालक चिमौरियाले बताए । कम्पनीमा उनीसँगै सचिन सिलवाल, अमीत सुवेदी लगायत छन् ।
उनीहरु यसअघि ब्रोकर कम्पनी चलाएर बसेका थिए । नेपालमा ब्रोकर कम्पनीको लाइसेन्स खासै विक्री नहुने भए पनि उनीहरुले ब्रोकर कम्पनी छाडेर मर्चेण्ट बैंकमा लगानी गरेका हुन् । चिमौरिया भने सेयर लगानीकर्ता एवम् सेयर विश्लेषक हुन् ।
योसँगै नेपाली बजारमा लगानी व्यवस्थापनको काम गर्ने मर्चेण्ट बैंकहरुको संख्या २६ पुगेको छ ।
