काठमाडौं । गार्डियन माइक्रो लाइफ इन्स्योरेन्सले आफ्नो पहिलो वार्षिक साधारण सभा फागुन ६ गते आयोजना गर्ने भएको छ । उक्त सभा होटल एअरपोर्ट विराटनगरमा दिउँसो १ बजे गर्ने कम्पनीले जनाएको छ । कम्पनीको माघ १४ गते बसेको संचालक समितिको बैठकले उक्त सभाको मिति तय गरेको हो ।
सभाले कम्पनीको साधारण शेयर(आइपीओ )सर्वसाधारणलाई जारी गर्ने विशेष प्रस्ताव अनुमोदन गर्नेछ । सभाले साधारण शेयर जारी पश्चात् प्राप्त पूँजी कहाँ उपयोग गर्ने प्रस्वात अनुमोदन गर्ने जनाएको छ । साथै, कम्पनीको साधारण शेयर जारी गर्ने सम्बन्धमा आवश्यक कार्य गर्न सञ्चालक समितिलाई अख्तियारी दिने दिने विशेष प्रस्ताव पारित गर्नेछ ।
त्यस्तै, सभाले आर्थिक वर्ष २०७९ /८० को संचालक समितिको प्रतिवेदन उपर छलफल गरी पारित गर्ने, आर्थिक वर्ष २०७९ /८० को लेखापरीक्षकको प्रतिवेदन सहित २०८० आषाढ मसान्तको वासलात, नाफा नोक्सान हिसाब, नगद प्रवाह विवरण लगायत सोहि अवधिका वित्तीय विवरणहरु सहित अनुसूचीहरु उपर छलफल गरी पारित गर्नेछ ।
सभाले आर्थिक वर्ष २०७९ /२०८० को लागि संचालक समितिबाट नियुक्त बाह्य लेखापरीक्षको नियुक्ति र पारिश्रमिक अनुमोदन गर्ने, कम्पनी ऐन, २०६३ को दफा १११ अनुसार आर्थिक वर्ष २०८०/०८१ को लागि बाहय लेखापरीक्षक नियुक्ती र निजको पारिश्रमिक निर्धारण गर्ने प्रस्ताव पनि अनुमोदन गर्नेछ ।
सभाले सञ्चालक समितिको गठन निर्वाचन गर्ने, स्वतन्त्र विज्ञ सञ्चालकको नियुक्ति, सञ्चालकहरुको बैठक भत्ता तथा अन्य सेवा सुविधा लगायतका प्रस्ताव पारित गर्ने जनाएको छ ।
