काठमाडौं । रिलायबल नेपाल लाइफ इन्स्योरेन्स लिमिटेडले चालु आर्थिक वर्षको तेश्रो त्रैमासको वित्तीय विवरण सार्वजनिक गरेको छ । सार्वजनिक गरिएको वित्तीय विवरण अनुसार तेश्रो त्रैमाससम्म कम्पनीले २८ करोड ५७ लाख खुद नाफा गरेको छ । गत आर्थिक वर्षको चैत मसान्तसम्म यो नाफा २१ करोड ६ लाख थियो । नाफा ३५ दशमलव ६४ प्रतिशतले वृद्धि भएको छ ।
९ महिनामा कम्पनीले २ अर्ब ७४ करोड माथि कुल बीमा शुल्क आर्जन गर्न सफल भएको छ । गत आर्थिक वर्षको तेश्रो त्रैमाससम्म कम्पनीले २ अर्ब ९९ करोड कुल बीमा शुल्क आर्जन गरेको थियो । एक वर्षको अवधिमा कुल बीमा शुल्क आर्जन करिब साढे ८ प्रतिशतले घटेको छ ।
२ अर्ब ८० करोड चुक्ता पुँजी भएको कम्पनीको जगेडामा १ अर्ब ३४ करोड रहेको छ । एक वर्षको अवधिमा जगेडा रकम ३० दशमलव ४९ प्रतिशतले वृद्धि भएको छ । जीवन बीमा कोष ४८ दशमलव २४ प्रतिशतले वृद्धि हुँदै ६ अर्ब २० करोड पुगेको छ। एक वर्ष अघि जीवन बीमा कोषमा ४ अर्ब १८ करोड थियो ।
प्रकाशित तथ्यांक अनुसार कम्पनीको प्रति शेयर आम्दानी १३ रुपैयाँ ६१ पैसा र प्रति शेयर नेट्वर्थ १५३ रुपैयाँ रहेको छ ।
