काठमाडौं । सिटिजन लाइफ इन्स्योरेन्स कम्पनीका प्रमुख कार्यकारी अधिकृत पोषक राज पौडेलको वार्षिक तलब सुविधा एक करोड २७ लाख रुपैयाँ रहेको छ । पौडेलले गत आर्थिक वर्ष २०७८/७९ मा वार्षिक तलब तथा अलाउन्सेस बापत ८२ लाख १८ हजार ६५० रुपैयाँ प्राप्त गरेका छन् । जवकी उनको यस भन्दा अघिल्लो आर्थिक वर्षको वार्षिक तलब तथा अलाउन्सेस ७३ लाख ३४ हजार थियो । अघिल्लो आर्थिक वर्ष २०७७/७८ मा उनले तलब अलाउन्से लगायत अन्य सेवा सुविधा सहित कुल ८८ लाख ४ हजार रुपैयाँ बुझेका थिए ।
गत वर्षको भन्दा यस वर्ष तलव सुविधा र इन्सेन्टिभ बढेको छ । पहिलो कार्यकाल पुरा भएर दोस्रो कार्यकाल सुरु गरेकाले पनि उनको तलब सुविधामा बृद्धि भएको हो ।
सिटिजन लाइफले नियम अनुसार पौडेललाई ७ लाख ७९ हजार रुपैया बोनस, इन्सेन्टिभ बापत ३७ लाख रुपैयाँ दिएको छ । पौडेलले यस भन्दा अघिल्लो आर्थिक वर्षमा नियमन अनुसार मुनाफाबाट १४ लाख ५१ हजार रुपैयाँ बोनस सुविधा पाएका थिए । कम्पनीले प्रमुख कार्यकारी अधिकृतलाई तलब सुविधा बाहेक सवारी साधन सुविधा पनि उपलब्ध गराएको छ ।
समिक्षा अवधिमा सञ्चालक समितिका सञ्चालकहरुले बैठक भत्ता बापत ६ लाख ८१ हजार रुपैयाँ बुझेका छन् । अन्य प्रबन्धक तथा व्यवस्थापनका पदाधिकारीहरुको तलब भत्तामा ५ करोड ९३ लाख खर्च भएको छ ।
