काठमाडौं । सिटिजन लाइफ इन्स्योरेन्स कम्पनीले प्रिमियममा आइपिओ निष्काशन गर्नका नेपाल धितोपत्र बोर्डमा निवेदन दिएको छ । कम्पनीले प्रिमियम सहित २९० रुपैयाँमा आइपिओ जारी गर्ने भएको हो ।
कम्पनीले एक करोड १२ लाख ५० हजार कित्ता आइपिओ जारी गर्ने तयारी गरेको हो । प्रिमियम सहित २९० रुपैयाँमा आइपिओ जारी गर्दा कम्पनीले प्राथमिक बजारबाट तीन अर्ब २६ करोड रुपैयाँ उठाउनेछ ।
हाल सिटिजन लाइफको चुक्ता पूँजी २ अर्ब ६२ करोड ५० लाख रुपैयाँ रहेको छ । प्राथमिक शेयर निष्काशन पछि चुक्ता पूँजी तीन अर्ब ७५ करोड पुग्नेछ । कम्पनीलाई ५ अर्ब पुर्याउन जम्मा एक अर्ब २५ करोड भए पुग्नेछ । तर प्राथमिक बजारबाटै कम्पनीले १९० रुपैयाँका दरले प्रिमियम संकलन गर्दा कुल २ अर्ब १३ करोड ७५ लाख रुपैयाँ संकलन गर्नेछ । यहि पैसाबाट कम्पनीले बोनस शेयर दिएर सहजै न्युनतम ५ अर्ब पुर्याउन सक्ने देखिन्छ ।
अहिलेकै अवस्थामा सिटिजनको जगेडा कोषमा एक अर्ब २५ करोड रुपैयाँ जम्मा भइसकेको छ । प्रिमियम मार्फत कम्पनीले २ अर्ब १३ करोड आर्जन गर्दा जगेडा कोषमा कुल तीन अर्ब ३८ करोड नाघ्नेछ । यसरी आइपिओ निष्काशन गरेर बोनस शेयर दिए पछि पनि कम्पनीले आफ्नो कोषमा २ अर्ब भन्दा माथिको रकम हुनेछ ।
नेपाल बीमा प्राधिकरणले चार बीमा कम्पनीहरुलाई प्रिमियममा आइपिओ निष्काशन गर्न अनुमति दिइसकेको छ । सन नेपाल लाइफ, आइएमई लाइफ र रिलायबल नेपाल लाइफले नेपाल धितोपत्र बोर्डमा निवेदन पेश गरिसकेका छन् । मर्जरको प्रकृयाँमा रहेको महालक्ष्मी लाइफले समेत प्रिमियममा आइपिओ निष्काशन गरेर मात्रै मर्जरमा जाने निर्णय गरिसकेको छ । नेपाल धितोपत्र बोर्ड र बीमा प्राधिकरण विचमा प्रिमिमयमा आइपिओ निष्काशन गर्न दिने विषयमा सहमति भइसकेको बुझिएको छ ।