काठमाडौं । चालु आर्थिक वर्षको ७ महिनामा जीवन बीमा कम्पनीहरुमा ६ अर्ब ६४ करोड रुपैयाँको सरेण्डर भएको छ । जवकी यहि अवधिमा कम्पनीहरुले १६ अर्ब ४५ करोड रुपैयाँ प्रथम बीमा शुल्क आर्जन गरेका छन् । प्रथम बीमा शुल्कको तुलनामा ४० प्रतिशत व्यवसाय सरेणडरमै सकिएको छ ।
कतिपय कम्पनीमा नयाँ व्यवसाय भित्र्याउने भन्दा पनि सरेण्डर मार्फत बाहिरिने व्यवसाय अत्याधिक धेरै छ । माघ मसान्तसम्ममा राष्ट्रिय बीमा कम्पनीले संकलन गरेको प्रथम बीमा शुल्कको तुलनामा ४० प्रतिशत व्यवसाय सरेण्डर भएको छ । संस्थानले ७ महिनामा ३९ करोड ३८ लाख रुपैयाँ प्रथम बीमा शुल्क आर्जन गर्दा ५२ करोड एक लाख रुपैयाँको सरेण्डर भएको छ ।
एलआइसी नेपालको पनि प्रथम बीमा शुल्क आर्जनको तुलनामा सरेण्डर हिस्सा १२९ प्रतिशत रहेको छ । कम्पनीले एक अर्ब ३१ करोड रुपैयाँ प्रथम बीमा शुल्क आर्जन गर्दा एक अर्ब ७० करोड रुपैयाँ बराबरको सरेण्डर नै गरेको छ । सरेण्डर रकमका हिसावले भन्दा सर्वाधिक धेरै नेपाल लाइफमा मात्रै २ अर्ब ७७ करोड रुपैयाँको सरेण्डर भएको छ । नेपाल लाइफलाई सरेण्डरले धेरै ठुलो असर पुर्याएको थियो ।
नयाँ भन्दा पुराना जीवन बीमा कम्पनीमा सरेण्डर धेरै छ । नयाँले अझै पनि सरेण्डरको तुलनामा प्रथम बीमा शुल्क आर्जन धेरै गरिरहेका छन् । यहि हिसावले सरेण्डर बढ्दै जाने हो भने आगामी वर्षदेखि नविकरण बीमा शुल्क आर्जनमा पनि ठुलो धक्का पर्ने देखिन्छ । यस वर्ष जीवन बीमा व्यवसाय करिव करिव नविकरण बीमा व्यवसायबाटै चलिरहेको छ ।
हाल जीवन बीमा कम्पनीले आर्जन गरेको कुल बीमा शुल्क आर्जनको ८१ प्रतिशत व्यवसाय नविकरण तर्फबाट रहेको छ । प्रथम बीमा शुल्क आर्जनको हिस्सा १९ प्रतिशत मात्रै छ । गत वर्षको तुलनामा माघ महिनासम्ममा प्रथम बीमा शुल्क आर्जन २७ प्रतिशत भन्दा धेरैले गिरावट आउदै गर्दा सरेण्डर पनि बढिरहेको छ ।
आर्थिक क्षेत्रमा आइरहेको मन्दीका कारण प्रिमियम तिर्न नसकेर बीमितहरुले पोलिसी नै सरेण्डर गरिरहेका छन् । प्राधिकरणले तीन वर्षसम्म सरेण्डर गर्न नपाउनुका साथै बीमालेख धितोकर्जा समेत प्रवाह गर्न नपाउने व्यवस्था गरिदिए पनि पुराना कम्पनीहरुमा सरेण्डर बढिरहेको छ । आगामी वर्षदेखि नयाँ जीवन बीमा कम्पनीमा पनि सरेण्डर रकम अत्याधिक बढ्न सक्ने विश्लेषकहरु बताउछन् ।