काठमाडौं । नेपाल राष्ट्र बैंकको निर्देशन पछि गुहेश्वरी मर्चेन्ट बैंकिङ एण्ड फाइनान्सको लाभांश घटेको छ । राष्ट्र बैंकको निर्देशन पछि यस अगाडी घोषित ७ प्रतिशत बोनस शेयरलाई घटाएर ६.५० प्रतिशत दिने निर्णय गरेको हो ।
संस्थाको पुस ५ गते मंगलबार बसेको सञ्चालक समितिको बैठकले आर्थिक वर्ष २०७८/७९ को मुनाफाबाट शेयरधनीहरुलाई चुक्ता पूँजी ९५ करोड ४ लाख को ७ प्रतिशत बोनस शेयर र ०.३७ प्रतिशत नगद लाभांशको प्रस्ताव गरेको थियो ।
सञ्चालक समितिको उक्त प्रस्ताव नियामक निकाय राष्ट्र बैंकमा स्वीकृतिका लागि प्रस्ताव गर्दा राष्ट्र बैंकले नियमनकारी कोषमा समायोजन गरी वित्तीय प्रतिवेदन पुनः पेश गर्न निर्देशन दिएको थियो । सोहि प्रतिवेदनका आधारमा संस्थाको पुस ११ गते बसेको सञ्चालक समितिको बैठकले बोनस शेयरलाई संशोधन गरि ६.५० प्रतिशत दिने निर्णय गरेको हो । त्यस्तै कर प्रयोजनका लागि ०.३४ प्रतिशत नगद लाभांश प्रस्ताव गरेको छ ।
संस्थाले प्रस्तावित लाभांश पुनः स्वीकृतिका लागि राष्ट्र बैंकमा पेश गर्ने छ । राष्ट्र बैंकले स्वीकृत गरे पछि मात्रै २१ औं वार्षिक साधारणसभामा पेश गर्नेछ । साधारणसभाबाट पारित भए पछि बल्ल शेयरधनीहरुले प्राप्त गर्ने छन् ।
1672051964101
