काठमाडौं । बाराही हाइड्रोपावर पब्लिक लिमिटेडको आइपीओ आज अन्तिम दिन मागभन्दा करीब २७ गुणा बढी आवेदन परेको छ । सिडिएस एण्ड क्लियरिङ लिमिटेडको अनुसार आज अन्तिम दिन साँझ ४ बजेर १५ मिनेटसम्म १२ लाख १६ हजार १५३ जनाले १ करोड ३८ लाख ७१ हजार २२० कित्ता शेयर खरीद माग गरेका छन् ।
कम्पनीले मङ्सिर २१ गतेदेखि सर्वसाधारणमा ५ लाख १५ हजार २२० कित्ता शेयर सार्वजनिक निष्काशन गरेको हो । पहिलो चरणमा आयोजना प्रभावित स्थानीयमा वितरण हुन नसकेको १ लाख ४ हजार कित्ता शेयर शेयरसमेत जोडेर कम्पनीले सर्वसाधारणमा कुल ५ लाख ५४ हजार कित्ता शेयर वितरण गर्दैछ ।
सर्वसाधारणमा वितरण गरिने कुल कित्ता शेयरमध्ये ५ प्रतिशत अर्थात् २७ हजार ७०० कित्ता सामूहिक लगानी कोषहरूको लागि बाँडफाँड गरिएको छ भने २ प्रतिशत अर्थात् ११ हजार ८० कित्ता शेयर कर्मचारीका लागि छुट्याइएको छ ।
आइपीओ निष्काशनका लागि गराएको रेटिङ्गमा इक्रा नेपाले कम्पनीलाई इक्रा एनपी इस्यूअर रेटिङ्ग बि माइनस प्रदान गरेको छ। यसले वित्तीय दायित्व बहन गर्ने क्षमतामा उच्च जोखिम रहेको संकेत गर्दछ ।
कम्पनीको शेयर निष्काशन तथा बिक्री प्रबन्धक एनआईबिएल एस क्यापिटल लिमिटेड रहेको छ । यस कम्पनीले बागलुङ जिल्लामा १ दशमलव ५ मेगावाट क्षमताको ठेउले खोला जलविद्युत् आयोजना निर्माण गरेको छ ।
