काठमाडौं । बीमा कम्पनीको सञ्चालक तथा प्रमुख कार्यकारी अधिकृत नियुक्ति गर्नु अगाडी अनिवार्य प्रहरी रिपोर्ट पेश गर्नु पर्ने भएको छ । नेपाल बीमा प्राधिकरणले सम्पुर्ण कम्पनीहरुलाई निर्देशन जारी गर्दै बीमकका सञ्चालक तथा कार्यकारी प्रमुखको नियुक्ति सम्बन्धी उपयुक्तताको परीक्षण ‘फिट एण्ड प्रपर टेष्ट’ अनिवार्य गर्नु पर्ने व्यवस्था गरेको हो ।
यस भन्दा अगाडी बीमा कम्पनीको सञ्चालक तथा प्रमुख कार्यकारी अधिकृत नियुक्त गर्नु अगाडी यस्तो रिपोर्टको व्यवस्था थिएन । अपराधिक कृयाकलापमा संलग्न भएको व्यक्तिलाई बीमा कम्पनीमा संलग्न हुन नदिन यस्तो व्यवस्था गरिएको हो ।
विभिन्न अपराधिक कृयाकलापमा संलग्न व्यक्ति बीमा जस्तो पब्लिक लिमिटेड कम्पनीमा संलग्न हुनु गैरकानुनी हो । प्रचलित कानुनमा अपराधिक क्रियाकलापमा संलग्न व्यक्ति सञ्चालक तथा सिइओ हुन नपाउने स्ष्ट व्यवस्था छ । तर बीमा प्राधिकरणले पुलिस रिपोर्टलाई नै अनिवार्य गरिदिएको छ ।
यसका साथै एक प्रतिशत भन्दा बढीको संस्थापक शेयर कारोबारको सम्बन्धमा प्राधिकरणको स्वीकृति माग गर्दा खरिदकर्ताले प्रहरी प्रतिवेदन पेश गर्नुपर्नेछ । एक प्रतिशत भन्दा बढी शेयर हुने शेयरधनी प्रमुख शेयरधनीभित्र पर्दछ । यसरी कम्पनीको प्रमुख शेयरधनी नै अपराधिक क्रियाकलापमा संलग्न हुनु राम्रो होइन ।
