काठमाडौं । महालक्ष्मी लाइफ इन्स्योरेन्सले चालु आर्थिक वर्ष (७९/८०) को पहिलो त्रैमासको वित्तीय विवरण सार्वजनिक गरेको छ । सार्वजनिक गरिएको वित्तीय विवरण अनुसार कम्पनीले प्रथम तीन महिनामा ३९ करोड ८४ लाख खुद बीमा शुल्क आर्जन गरेको छ । गत आर्थिक वर्षको सोही अवधिमा कम्पनीले ३२ करोड ५२ लाख खुद बीमा शुल्क आर्जन गरेको थियो । समिक्षा अवधिमा खुद बीमा शुल्क आर्जनमा २२ दशमलव ५१ प्रतिशतको वृद्धि देखिएको छ ।
चालु आर्थिक वर्षको पहिलो त्रैमाससम्म कम्पनी ३ करोड २६ लाख रुपैयाँ खुद नाफामा रहेको छ । गत आर्थिक वर्षको प्रथम त्रैमाससम्म कम्पनी २ करोड ५४ लाख मात्र नाफामा थियो । नाफा २८ दशमलव २१ प्रतिशतले २१ वृद्धि भएको छ ।
२ अर्ब १० करोड चुक्ता पुँजी भएको यस कम्पनीको जगेडामा ३१ करोड ७४ लाख संचित छ । समिक्षा अवधिमा जगेडा कोष ५१ दशमलव ९२ प्रतिशतले बढेको छ ।
जीवन बीमा कम्पनीको लागि एकदमै महत्वपूर्ण जीवन बीमा कोष ५६ दशमलव ३४ प्रतिशतले वृद्धि हुँदै २ अर्ब ४० करोड पुगेको छ ।
कम्पनीका अनुसार कम्पनीले ६ करोड २९ लाख खुद दावी भुक्तानी गरेको छ भने २ करोड १० लाख दावी भुक्तानी गर्न बाँकी छ ।
