काठमाण्डौं । भारत सरकारले धानको निर्यातमा लगाएको २० प्रतिशतको भंसार शुल्क नेपालको लागि पुनः हटाएको छ । भारत सरकारको वित्त मन्त्रालय अन्तर्गतको राजश्व विभागले कात्तिक १४ गते सार्वजनिक गरेको निर्देशनमा नेपालको लागि धान निर्यातमा लगाइएको भन्सार शुल्क हटाइएको घोषणा गरेको हो ।
यसअघि गत भदौ २३ मा जारी गरिएको निर्देशनमार्फत् नेपालको लागि समेत धानको निर्यात गर्दा २० प्रतिशत भंसार शुल्क कायम गरेको थियो । भन्सार महशुल थपिएपछि चामल महँगो हुँदा यसको सिधा असर नेपाली उपभोक्तामा परेको थियो । नेपालले भारतबाट ठूलो परिमाणमा चामल आयात गर्दै आएको छ । चामलमा भारतीय भन्सार महशुल वृद्धि भएको बहानामा अहिले स्थानीय बजारमा खुद्रा मूल्यमै प्रति किलो दश रुपैयाँका दरले चामल महँगो भएको छ ।
नेपाल चामल, दाल, तेल सङ्घका अध्यक्ष डा. सुबोधकुमार गुप्ताले भारतले धानको निर्यात लगाएको महशुल फिर्ता लिएपछि उपभोक्तालाई ठूलो राहत मिल्ने बताए । उनले अनुचित महशुल फिर्ता लिनको लागी संघले भारतीय कुटनीतिज्ञहरुसमक्ष पत्राचार र भेटघाटमार्फत् ध्यानाकर्षण गराएको जानकारी दिए ।
उनले गत वर्ष नेपालले भारतबाट साढे ५ लाख मेट्रिक टन धान आयात भएको तथ्यांकको आधारमा यस वर्ष ६ लाख मेट्रिक टन आयात गर्न पाउने अनुमति पाइएको जानकारी दिएका छन् । उनले धानको सहज आपूर्तीले चामल उत्पादक उद्योगलाई समेत राहत मिल्ने प्रतिकृया दिएका छन् ।
नेपालीकाे भात खाने बानी उच्च हुनुका साथै स्वदेशी उत्पादनले अपुग हुँदा भारतबाट वर्षेनी ठूलाे परिमाणमा धान चामल आयात हुँदै आएकाे छ । भन्सार विभागका अनुसार आर्थिक वर्ष २०७८।७९ काे पहिलाे ११ महिनामै ४५ अर्ब २९ कराेड रुपैयाँ मूल्य बराबरकाे धानचामल भारतबाट आयात गरिएकाे थियाे ।
