काठमाडौं । बाणिज्य बैंकहरुमा चरम तरलता अभावको समस्या समाधान हुने संकेत देखिएको छ । सिडी रेसियो टाइट हुँदा कर्जा लगानी नै ठप्प भइरहेको अवस्थामा असार महिनामा मात्रै ९४ अर्ब रुपैयाँले निक्षेप भित्रिएको छ । निक्षेप संकलन बढे सँगै सिडी रेसियो भने ८८.५५ प्रतिशतमा झरेको छ । केहि महिना अगाडी बाणिज्य बैंकहरुको सिडी रेसियो ९२ प्रतिशतसम्म पुगेको थियो ।
असार महिनाका चार सातामा बाणिज्य बैंकहरुले निक्षेप संकलन ९४ अर्बले बृद्धि गर्दा कर्जा लगानी १९ अर्बले खुम्चिएको छ । बैंकर्स संघका अनुसार असार २४ गतेसम्ममा बाणिज्य बैंकहरुले ४४ खर्ब ९४ अर्ब रुपैयाँ निक्षेप संकलन गरेका छन् । जवकी जेठ अन्तिम दिन बाणिज्य बैंकहरु सँग निक्षेप संकलन ४४ खर्ब मात्रै थियो ।
त्यस्तै कर्जा विस्तार भने खुम्चिन थालेको छ । बाणिज्य बैंकहरुले कर्जा असुली गरिरहेका छन् । तर सिडी रेसियो व्यवस्थापनका लागि नयाँ कर्जा प्रवाह नगर्दा कर्जा विस्तार घटेको हो । गत जेठ मसान्तमा कर्जा विस्तार ४१ खर्ब ९३ अर्ब रुपैयाँ थियो । तर अहिले कर्जा लगानी ४१ खर्ब ७४ अर्ब रुपैयाँ मात्रै छ ।
