काठमाडौं । आइएमई जनरल इन्स्योरेन्स लिमिटेडले विक्री गरेको अवितरित हकप्रद शेयर बाँडफाँड गरेको छ । कम्पनीले यस अघि फागुन २२ गतेदेखि चैत १३ गतेसम्म हकप्रद शेयर विक्री खुला गर्दा वितरण हुन नसकेको संस्थापकतर्फको २ हजार २६१ कित्ता र सर्वसाधारणतर्फको ८८ हजार ९३४ कित्ता शेयर वैशाख १२ गतेदेखि २१ गतेसम्म लिलामी प्रकृयाबाट विक्री गरेको थियो ।
तोकिएको अवधिभित्र प्राप्त बोलपत्र बैशाख २८ गतेका दिन विक्री प्रबन्धकको कार्यालय नक्साल, काठमाडौंमा खोली फेसबुकमार्फत प्रत्यक्ष प्रशारण गरिएको थियो । जेठ ३ गते निष्काशनकर्ता कम्पनीको सञ्चालक समितिको बैठकले उक्त शेयर बाँडफाँड गरेको हो ।
कम्पनीको संस्थापकतर्फको शेयरको कटअफ मूल्य १५१ रुपैयाँ र सर्वसाधारणतर्फको कटअफ मूल्य ४६५ रुपैयाँ राखी शेयर बाँडफाँड गरिएको विक्री प्रबन्धक ग्लोबल आइएमई क्यापिटल लिमिटेडले जनाएको छ ।
बोलपत्रवालाहरुको बाँडफाँडमा नपरेको वा आंशिक परी बाँकी शेयर वापतको रकम फिर्ता भुक्तानी जेठ ५ गतेदेखि गरिने कम्पनीले बताएको छ । ।
