काठमाडौं । अर्थ सचिव मधुकुमार मरासिनीले नयाँ बीमा कम्पनी स्थापनाका लागि अर्थमन्त्रालयमा दवाव परिरहेको बताएका छन् । राष्ट्रिय बीमा संस्थाको ५५ औ वार्षिकोत्सवको अवसरमा मरासिनीले निजी स्तरबाट नयाँ बीमा कम्पनी स्थापनाका लागि दवाव आइरहेको बताएका हुन् । पछिल्लो समय बजारमा बीमा व्यवसाय प्रतिस्पर्धी बन्दै गर्दा पनि नयाँ कम्पनीहरुको माग भइरहेको उनले जानकारी दिए ।
राष्ट्रिय बीमा संस्थानमा १५ वर्ष अगाडी जुन किसिमको समस्या थियो आज पनि त्यहि समस्या देखिएको भन्दै मरासिनीले अहिलेका समस्या समाधानका लागि पहल गर्न अनुरोध गरेका छन् । वार्षिकोत्सवको अवसरमा संस्थानका कर्मचारीहरुले राखेको मागलाई संबोधन गर्दे मरासिनीले सबैभन्दा पहिला संस्थाको व्यवसाय बृद्धिका लागि पहल गर्न निर्देशन दिएका छन् । उनले भने ‘तपाईहरुले व्यवसाय बढाउनु भयो भने सेवा सुविधाको माग गर्नु तपाईहरुको अधिकार हो । तपाईहरुले व्यवसाय बृद्धि गर्नु भयो भने कुनै पनि शक्तिले तपाईहरुको सेवा सुविधा बढाउनका लागि रोक्न ।’ उनले थपे ‘संस्थालाई प्रतिस्पर्धी बनाउन तिर लाग्नुहोस् । हामीले हेर्दा हेर्दै निजी क्षेत्रबाट थुप्रै कम्पनीहरु आइरहेका छन् । निजी क्षेत्रलाई यो व्यवसाय एकदमै क्रियटिभ छ । तपाईहरुले सन्दै आउनु भएको होला कति धेरै मानिसहरुले बीमा व्यवसाय गर्नलाई, नयाँ नयाँ बीमा कम्पनी दर्ता गर्नलाई खोजिरहेका छन् । यसका लागि अनेक किसिमका दवाव भनौ वातावरण पनि बनाइरहेका छन् ।’
‘यो भनेको बजारमा बीमाको माग छ भन्ने हो । बजारमा मागै छैन भने किन कम्पनीका लागि यति धेरै दवाव आउछ’, मरासिनीले भने । बजारमा बीमाको माग छ भने संस्थानले पनि बिक्री गर्न सक्नु पर्ने भन्दै मरासिनीले व्यवसाय बृद्धिका लागि निर्देशन दिएका हुन् ।
सरकारको लगानी भएको संस्थानलाई सरकारको साथ भएको हुनाले काम गर्न सहज भएको भन्दै उनले संस्थानको पछाडी तीन करोड जनसंख्या भएको हुँदा नडाराउन समेत उनले आग्रह गरे । नयाँ प्रोडक्ट ल्याउन उनले अनुरोध गरे । उनले भने ‘यसलाई अनि व्यवसायिक हिसावले चलाउनुस् ।’
