काठमाडौं । बैंक तथा वित्तीय संस्थामा लगानीयोग्य पूँजीको खडेरीको नकारात्मक असर जीवन बीमा व्यवसायमा एकपछि अर्को गर्दै देखा पर्न थालेको छ ।
परम्परागत वित्तीयहरु बैंक, वित्तीय संस्था, सहकारी संस्थाबाट कर्जा पाउनै मुश्किल भएपछि पैसाको जोहो गर्ने विकल्प खोज्दै सर्वसाधारण र व्यापारीहरु बीमालेख धितो राखेर कर्जा लिने, बीमाको आवधिक भुक्तानी सकृयतापूर्वक लिने र बीमालेख समर्पण गर्ने विकल्पहरुको प्रयोग गर्न थालेका छन् ।
जीवन बीमा कम्पनीको बीमितलाई बीमालेख सम्बन्धि सेवा प्रदान गर्ने विभाग ‘पोलिसी सर्भिसिङ्ग विभाग’ का कर्मचारीका अनुसार बीमालेख कर्जा र समर्पणको संख्या दुई महिनायता ह्वात्तै बढेको छ ।
असमयमै हुने बीमालेख समर्पण बीमकको लागि मात्र नभएर स्वयम् बीमितको लागि समेत घाटाको कारोबार हो । बीमा सम्बन्धी जानकारका अनुसार छ वर्ष पुरा नहुँदै बीमालेख समर्पण गर्दा संचालन/व्यवस्थापन खर्चको कारण बीमकलाई र न्यून समर्पण मूल्यका कारण बीमितलाई समेत घाटा हुन्छ । यस्तो समर्पणको सिधा असर जीवन बीमकले वितरण गर्ने बीमालेख बोनशमा समेत पर्न जान्छ । र, समर्पण दर बढ्दै जाँदा बोनश दर घट्दै जान्छ ।
बैंकहरुको कर्जाको ब्याज दरको तुलनामा अहिले बीमालेख कर्जाको ब्याजदर सस्तो भएपनि बैंकले जस्तो मासिकरुपमा ब्याज भुक्तानी गर्नैपर्ने बाध्यात्मक अवस्था हुँदैन । बीमालेख कर्जा लिएको रकमको ब्याज छ छ महिनामा चुक्ता नगर्दा सावाँमा ब्याज समेत जोडिएर ब्याज गणना हुँदा बीमितले प्राप्त गर्ने रकमभन्दा तिर्नुपर्ने रकम अधिक हुन गई बीमालेख निष्कृय हुने जोखिम पनि उत्तिकै हुन्छ ।
