काठमाडौं । बैंक अफ काठमाण्डू लिमिटेडले ग्राहकलाई उत्कृष्ट सेवा–सुविधा उपलब्ध गराउने क्रममा कन्ट्याक्टलेस भिसा डेबिट कार्ड सञ्चालनमा ल्याएको छ । नियर फिल्ड कम्युनिकेसन (एनएफसी) मा आधारित उक्त कार्ड एनएफसीयुक्त अर्थात् ट्याप सुविधा भएको पीओएस मेसिनमा प्रयोग गरी भुक्तानी गर्न सकिने बैंकले जनाएको छ ।
यस प्रविधिमा मेसिनभित्र कार्ड नराखी एउटा सीमित दूरीबाट पीओएस मेसिनमा ट्याप मात्र गरी भुक्तानी गर्न सकिन्छ । हालको कोरोना महामारीको जोखिम न्यूनीकरणका लागि यो कन्ट्याक्टलेस कार्डको माध्यमबाट भुक्तानी गर्दा ग्राहकलाई व्यक्तिगत दूरी कायम गर्न सहज हुने बैंकले बताएको छ । हाललाई यो प्रविधिमार्फत ग्राहकले हरेक पटक २ हजार रुपैयाँसम्म कारोबार गर्न सक्नेछन् ।
हाल बैंकले ९० शाखा, ७८ एटीएम र १० एक्सटेन्सन काउन्टरबाट ग्राहकलाई बैंकिङ सेवा दिँदै आएको छ ।
