काठमाडौं । नेपाल बंगलादेश बैंकको संस्थापक शेयर खरिदका लागि साविकका ८ संस्थापकले आवेदन दिएका छन् । नेपाल बंगलादेश बैंकको संस्थापक शेयरधनी आईएफआईसी बैंक ढाकाले आफ्नो सम्पुर्ण शेयर बिक्रीका लागि आवेदन दिए सँगै साविकका संस्थापकहरुका लागि प्रस्ताव आह्वान गरिएको थियो ।
बैंकले आफ्नो नाममा रहेको तीन करोड ६८ लाख २७ हजार ४२६ कित्ता र आर्थिक वर्ष २०७७/७८ मा प्राप्त हुने बोनस शेयर सहितको लागि लागि आवेदन खुलाइएको थियो । बैंकले गत असार २९ गते सार्वजनिक सूचना जारी गर्दै ३५ दिनको म्याद दियएको थियो ।
आईएफआईसी बैंक ढाकाको शेयर खरिदका लागि एनवि समुहका व्यक्ति तथा कम्पनीहरुले आवेदन दिएका छन् । हाल एनवि समुहका लक्ष्मी बहादुर श्रेष्ठको ०.६२ प्रतिशत शेयर रहेको छ । त्यस्तै श्रेष्ठका छोराहरु एल्सन र बिन्सन सहित बिनु श्रेष्ठले आवेदन दिएका छन् । हाल एल्सन र बिन्सन दुबैको ०.९९ प्रतिशत शेयर रहेको छ । यसै समुह अन्तर्गतका मानङ्ग इन्भेष्टमेन्ट प्रालि, हिमालयन क्यापिटल मार्केट्स एण्ड इन्भेष्टमेन्ट प्रा.लि, दिब्यश्वरी इन्भेष्टमेन्ट र हिमसागर ट्रेडिङले सेयर खरीदका लागि आवेदन दिएका छन् । हाल हिमालयनको ०.७० प्रतिशत रहेको छ । उनिहरुले १५० भन्दा माथिको लागि आवेदन दिएका छन् ।
आईएफआईसी बैंक ढाकाकको हाल ४०.८९ प्रतिशत हिस्सा रहेको छ । एउटा व्यक्ति तथा समुहले १५ प्रतिशत भन्दा धेरै शेयर खरिद गर्न पाउदैनन् । तर हाल कायम रहेका शेयरधनीहरु मध्ये कसैको पनि तीन प्रतिशत भन्दा धेरै शेयर छैन । यसले गर्दा उनिहरुले नै पुरै शेयर उठाउन सक्ने देखिएको हो । यस भन्दा अगाडि नविल बैंकका शेयरधनीले एविको शेयर खरिद गर्ने र नविलमा मर्ज गराउने हल्ला चलेको थियो ।
उक्त सम्पुर्ण आवेदनको फिट एण्ड प्रपर टेष्ट गर्नु पर्ने हुन्छ । यदि फिट एण्ड प्रपर टेष्ट अनुसार उनिहरु अयोग्य ठहरिए मात्रै सार्वजनिक रुपमा साविक संस्थापक भन्दा बाहिरका लगानीकर्ताका लागि आह्वान हुने छ ।
