काठमाडौं । आरएमडिसी लघुवित्त वित्तीय संस्था लिमिटेडको स्वामित्वमा रहेको फरवार्ड माईक्रोफाइनान्स लघुवित्त वित्तीय संस्था लिमिटेडको लिलामी शेयर बाँडफाँड भएको छ ।
कम्पनीको ३ लाख ९४ हजार ६३४ दशमलव ४६ कित्ता संस्थापक शेयर विक्रीका लागि असार ३ गतेदेखि १७ गतेसम्म बोलपत्र आव्हान गरिएको थियो । उक्त अवधिमा प्राप्त बोलपत्रदाताहरुलाई असार २२ गते ३ लाख ७४ हजार कित्ता शेयर बाँडफाँड गरिएको हो ।
यस पटकको बोलपत्र आव्हानका क्रममा कम्पनीको २० हजार ६३४ दशमलव ४६ कित्ता शेयर भने वितरण हुन सकेन । माग बमोजिम ८९६ देखि ८५० दशमलव ५० सम्मको मूल्य अंकित गर्ने बोलपत्र दाताहरुलाई शेयर बाँडफाँड गरिएको कम्पनीले जनाएको छ ।
कम्पनीले प्रतिकित्ता ८५० मूल्य तोकेर शेयर लिलामीमा ल्याएको थियो । रितपूर्वक आवेदन नदिई बाँडफाँडमा नपरेका आवेदकहरुको रकम असार २५ गतेदेखि बैंक खातामै रकमान्तर गरिने कम्पनीले बताएको छ । शेयर विक्री प्रबन्धकमा सनराइज क्यापिटल लिमिटेड रहेको छ ।
