काठमाडौं । आरएसडीसी लघुवित्त वित्तीय संस्था लिमिटेडको वार्षिक साधारण सभा हुँदैछ । संस्थाको मंसिर २८ गते बसेको सञ्चालक समितिको बैठकले गरेको निर्णय अनुसार संस्थाको सातौँ वार्षिक साधारण सभा एशियन होटेल, कालिकानगर, रूपन्देहीमामा भर्चुअल माध्यमबाट सञ्चालन हुने जनाएको छ ।
सभामा संस्थाको असोज २४ गते, शनिबार बसेको सञ्चालक समितिको बैठकले गरेको निर्णय अनुसार संस्थाका शेयरधनीहरूलाई ९ प्रतिशत बोनस शेयर र ३ दशमलव ६३ प्रतिशत नगद लभांश (बोनस शेयरको कर प्रयोजनार्थ समेत) वितरण गर्ने प्रस्ताव पारित गरिनेछ ।
साथै, सभामा संस्थाको सञ्चालक समितिको तर्फबाट अध्यक्षद्वारा आर्थिक वर्ष २०७६/७७ को वार्षिक प्रतिवेदनबारे छलफल गरी पारित गर्ने, आर्थिक वर्ष २०७६/७७ को लेखापरीक्षण प्रतिवेदन, वासलात, नाफा नोक्सान हिसाब र सोहि अवधिको नगद प्रवाह विवरण लगायतका वित्तिय विवरणहरू छलफल गरी पारित गर्ने, आर्थिक वर्ष २०७७/७८ को लागि लेखापरीक्षक नियुक्ती गरी पारिश्रमिक निर्धारण गर्ने लगायतका एजेन्डाहरू रहेका छन् ।
त्यसैगरी, संस्थाले साधारण सभा तथा लाभांश वितरण प्रयोजनका लागि पुस १० गते बुक क्लोज गरेको थियो । त्यसैले, पुस ९ गतेसम्म नेप्सेमा कारोबार भई कायम शेयरधनीहरुले मात्र साधारण सभामा भाग लिन तथा लाभांश प्राप्त गर्न सक्नेछन् ।
