काठमाडौं । मकवानपुरको हर्नामाडीमा रहेको रहेको ज्योति माविमा अंग्रेजी माध्यमबाट अध्यापन गराउने विद्यालयको निजि स्रोतमा कार्यरत १६ जना शिक्षकको जीवन बीमा गरिएको छ ।
हेटौडा उपमहानगरपालिका वडा नं १८ मा रहेको ज्योति माविले आफ्नै स्रोत परिचालन गरी अंग्रेजी माध्यमबाट अध्यापन गराउँदै आएको छ । सामुदायिक विद्यालयमा कार्यरत स्रोतका शिक्षकको आत्मबल बढाउन विद्यालय व्यवस्थापन समितिले छ वटा विभिन्न बीमा सुविधा सहित एक लाख बीमाङ्कको जीवन बीमा गराएको हो ।
सो विद्यालयले सिटिजन लाईफमा जीवन बीमा गराइएको विद्यालयका प्रध्यानाध्यापक जयराम थापाले बताए । विद्यालयकै आयस्रोतबाट बीमा शुल्क भुक्तानी गर्ने गरी प्रत्येक शिक्षकको न्युनतम एक लाख बराबरको सिटिजन लाइफ शुभारम्भ जीवन वीमा गरिएको हो । साथै विद्यालयले दुर्घटना, पुर्ण अंगभंग सहित ६ वटा अतिरिक्त सुबिधा सहितको जीवन वीमा गराएर शिक्षकहरुलाई पठनपाठनमा उच्च मनोबलका साथ लाग्न प्रेरित गरेको प्रधानाध्यापक थापाले बताए ।
सिटिजन लाईफ इन्सोरेन्स कम्पनीका क्षेत्रीय शाखा प्रमुख शिव कुमार कार्कीले व्यवस्थापन समितिका अध्यक्ष हर्क रम्तेललाई विद्यालयमै पुगेर बीमा पोलिसी हस्तान्तरण गरेका छन् । ज्योति मावि मकवानपुरकै गुणस्तरीय शिक्षाको लागि प्रख्यात सामुदायिक विद्यालय हो ।
