काठमाण्डौ । छिमेकी मुलुक भारत र बंगलादेशमा बिध्वंसकारी चक्रवात ‘बुलबुल’ले प्रहार गरेको छ । शक्तिशाली सामुद्रिक चक्रवात ‘बुलबुल’का कारण भारत र बंगालादेशका हजारौँ नागरिक प्रभावित भएको अन्तर्राष्ट्रिय समाचार संस्थालेहरुले जनाएका छन् । बीबीसीले बंगालको खाडीबाट उठेको बुलबुलका कारण भारत र बंगलादेशका पाँच लाखभन्दा बढि मानिस प्रभावित भएको जनाएको छ । उनीहरुलाई अन्यत्र सारिएको छ ।
विशाल आँधीका कारण सो क्षेत्रमा दुई जनाको मृत्यु भइसकेको छ भने कैयौं घाइते भएका छन् । हजारौं घरहरु ध्वस्त भएको जनाइएको छ । शक्तिशाली चक्रवातका कारण सो क्षेत्रका बन्दरगाह र विमानस्थलसमेत बन्द गराइएको छ ।
चक्रवात बुलबुलका कारण ठूलो रकम बीमा दावी पर्ने अनुमान गरिएकोछ । चक्रवातले सम्पत्ति बीमा अन्तर्गत घर, व्यापारिक फर्महरु तथा उद्योगहरुमा क्षति पुगेको छ ।
नेपालमा कस्तो पर्ला असर ?
बंगालको खाडीबाट उठेको विशाल चक्रवात आँधी उत्तरी क्षेत्रतर्फ बिस्तारै सरिरहेकोले मौषमविदहरुले जनाएका छन् । उत्तरतिर सर्दै आउँदा नेपालको पूर्वी क्षेत्रमा त्यसले असर गर्ने देखिएको छ । यद्यपि कमजोर हुने अवस्थामा रहेकोले नेपालमा खासै असर गर्दैन सामान्य पानी मात्रै पर्ने वा आकाश धुम्मिएर मात्रै टर्न पनि सक्नेछ ।