काठमाडौं । नेपाल पुनर्बीमा कम्पनीले नेपाल बाहेक ३० वटा देशमा व्यापार सञ्जाल विस्तार गर्न सफल भएको छ । स्थापनाको छोटो अवधीमा नै कम्पनीले अन्तर्राष्ट्रिय स्तरमा व्यापार विस्तार गर्न सफल भएको हो ।
नेपालमा पुनर्बीमा कम्पनी नहुँदा भारत वा तेस्रो देशमा रहेका पुनर्बीमा कम्पनीमा पुर्नबीमा गर्न नेपाली बीमा कम्पनीहरु बाध्य थिए । अहिले नेपालमै पुनर्बीमा कम्पनी स्थापना भएपछि सानो–सानो बीमाका लागि पनि विदेशी पुनर्बीमा कम्पनीको मुख ताक्नुनर्पे अवस्थाको अन्त्य भएको छ ।
विस २०७१ कार्तिक २० गते स्थापना भएको नेपाल पुनर्बीमा कम्पनीले छोटो अवधीमा नै विश्वका धेरै देशसँग कारोबार गर्न सक्ने हुनु बीमा व्यापार विस्तारको राम्रो सम्भावना देखिएको छ ।
गत वर्ष काठमाडौंमा सम्पन्न विकासशील राष्ट्रहरुको बीमा तथा पुनर्बीमा कम्पनीहरुको २१ औं सम्मेलन पश्चात नेपाल पुनर्बीमा कम्पनीको व्यापार विस्तारमा ठूलो सहयोग पुगेको छ । सो सम्मेलनमा विभिन्न १८ देशका चार सयभन्दा बढि बीमा प्रतिनिधिहरु सभागी थिए ।
एशियाली मुलुकहरु मात्रै नभएर उत्तर अमेरिकी राष्ट्र भेनेजुयलामा समेत नेपाल पुनर्बीमा कम्पनीको व्यापार विस्तार भएको देखिएको छ । त्यस्तै युरोपको टर्कीमा पनि व्यापार गर्न सक्नुले नेपाल पुनर्बीमा कम्पनीको व्यापार विस्तार भएको छ । नेपाल पुनर्बीमा कम्पनी अण्डरराईटिङ शाखाकी बरिष्ठ सहायक सरिता श्रेष्ठले दिएको जानकारी अनुसार अहिले कम्पनीको व्यापार बिस्तार ३० वटा देशमा फैलिईसकेको छ, ति देशहरुबाट धेरै वा थोर कारोबार भइरहेका छन् ।
नेपाल पुनर्बीमा कम्पनीले उपलब्ध गराएको तथ्याङ्क अनुसार बहराईन, बगंलादेश, भुटान, कम्बोडिया, क्याम्रोन, दुवई, घाना, ग्यूनिया, भारत, इभेरी कोस्ट, केन्या, कुवेत, मलेसिया, मंगोलिया, म्यानमार, ओमान, पाकिस्तान, प्लेस्टाईन, भेनेजुयुला, भियतनाम र यमन, टर्की, तुर्मेकिस्तान, नाईजेरिया, पपुवान्यूगिनी गायतका गरी ३० वटा देशहरुका बीमा कम्पनीहरुले नेपाल पुनर्बीमा कम्पनीमा पुनर्बीमा गराएका छन् ।
बीमा समितिको प्रावधान अनुसार बीमा कम्पनीहरुले आफूले गरेको बीमाको २० प्रतिशतको जोखिम बहनको अर्को कम्पनीमा पुनर्बीमा गराउनुपर्ने व्यवस्था छ । नेपाली बीमा कम्पनीहरुले अझै पनि पुनर्बीमा गराउनको लागि विदेशी कम्पनीमा जाने गरेका छन् । यद्यपि हवाई बीमा भने पुँजि नपुगेका कारण नेपाल पुनर्बीमा कम्पनीले गर्ने गरेको छैन ।
