काठमाडौ: लघुबीमा व्यवसाय संचालनका लागी छुट्टै लघुबीमा कम्पनी पनि खोल्न सकिने भएको छ । संसदमा दर्ता भएको नयाँ विद्येयकमा गरिएको व्यवस्था अनुसार लघु बीमा कम्पनी पनि संचालन गर्न पाईने भएको छ ।
न्यून आय भएका वर्गलाई पनि बीमाको दायरामा सरकारले लघु बीमा योजना संचालनमा ल्याएको हो । आर्थिक बर्ष २०७२/७३ को बजेट भाषण मार्फत सरकारले कम्पनीहरुलाई आफनो व्यवसायको अनिवार्य रुपमा पाँच प्रतिशत लघुबीमा व्यवसाय गर्न निर्देशन दिएको थियो । गत आवको बजेट भाषण मार्फत भने कम्पनीलाई आगामी दुई बर्ष भित्रमा यस्तो व्यवसाय १० प्रतिशत पुव्याउन निर्देशन दिएको छ । जोखिममा रहेका व्यक्तिलाई बीमा झनै आवश्यक भएको भन्दै सरकारले छुट्टै कम्पनी नै खोल्न सकिने व्यवस्था गरेको छ ।
कानुनी अडचनले रोकिएको थियो लघुबीमा कम्पनी
बीमा बिद्येयकमा लघुबीमा कम्पनी खोल्न सकिने व्यवस्था गर्नु अघि नै पुर्नबीमा कम्पनीको नेतृत्वमा जीवन बीमा र निर्जीवन बीमा कम्पनीको संयुक्त लगानीमा लघुबीमा कम्पनी स्थापना गर्ने प्रयास भएको थियो । ५० करोड रुपैयाँ बराबर चुक्ता पूँजी भएको लघुबिमा कम्पनी खोल्ने तयारी गरिएको छ । तर, कानुनी अडचनका कारण समितिले कम्पनी दर्ताको प्रक्रिया रोकेको थियो ।
लघु बीमा निर्देशिका २०७१ का अनुसार १५० रुपैयाँमा दुर्घटना लघु बिमा योजना खरिद गर्न सकिनेछ । यस योजनाको बिमांक रकम भने १ लाख ५० हजार रुपैयाँ रहेको छ । बिमीतले बीमांक रकमको शून्य दशमलव १ प्रतिशत बीमा शुल्क भुक्तानी गर्नुपर्नेछ । त्यस्तै, ५ सय रुपैयाँमा गार्हस्थ लघु बीमा योजना खरिद गर्न सकिनेछ। यो रकम बीमांक रकमको शून्य दशमलव २५ प्रतिशत हो । यस योजनाको बीमांक रकम २ लाख रुपैयाँसम्म हुनेछ। यस योजनाले बीमीतको सम्पतिको जोखिम बहन गर्दछ । स्वास्थ्य लघु बीमा योजनाको बीमा शुल्क १ हजार ४ सय रहेको छ। यो रकम बिमांक रकमको ४ प्रतिशत हो । यस योजना खरिद गरे बापत्त एकापरिवारका पाँच जना सदस्यले ३५ हजारसम्मको स्वास्थ्य उपचार गर्न सक्नेछन् ।
