काठमाडौं । नेपाल उद्योग बाणिज्य महासंघले नन ट्यारिफ विजनेसलाई न्युनतम शुल्क निर्धारण गरेको भन्दै समितिलाई ध्यानाकर्षण गराएको छ । महासंघले प्रेश विज्ञप्ती जारी गर्दै बीमा समितिले गएको असोज ६ गते सबै निर्जिवन बीमा कम्पनीहरूको लागि जारी गरेको गैर शुल्क बीमा व्यवसायका लागि न्यूनतम प्रिमियम दरको सिमा तोकेको प्रति गम्भीर ध्यानाकर्षण गराएको हो ।
खुला बजार अर्थव्यवस्थामा नियामक निकायद्धारा प्रिमियम वृद्धि सोही दरलाई नै न्युनतम सिमा तोकिदा एकाएक आयोजनाको लागत बढ्न जाने महासंघको धारणा छ । स्वतन्त्र उर्जा उत्पादकहरूको संस्था, निर्माण व्यवसायी महासंघ लगायतका आयोजना निर्माणमा संलग्न संघ/संस्था एवं उद्यमी व्यवसायीहरूका अनुसार बीमा समितिले जारी गरेको निर्देशनमा बीमाको प्रीमियम शुल्क भुक्तानी गरेपनि विमितले विमकबाट दावी भुक्तानी पाउन नसक्ने खालका विभिन्न शर्तहरूको राखिएका छन् । यस बिषयमा सबै सरोकारवालासंग अविलम्व छलफल गर्न पनि महासंघले माग गरेको छ ।
यसैगरि बजारमा प्रतिष्पर्धा निरुत्साहित हुने गरि नियामक निकाय समितिद्वारा निर्जीवन बीमा कम्पनीहरुलाई गैर शुल्क विमा व्यवसायका लागि न्यूनतम प्रिमियम दर सम्बन्धमा जारी गरिएको निर्देशनमा पुनरावलोकन गर्न महासंघले आग्रह गरेको छ । खुला बजार अर्थव्यवस्थामा प्रतिष्पर्धाद्धारा मुल्य निर्धारण हुने हुदा न्युनतम शुल्क तोक्न नहुने महासंघको धारणा छ ।
साथै अर्थतन्त्रको पुनरोत्थानका लागि लगानी प्रवर्द्धन र रोजगारी सिर्जना हुने व्यवसायिक वातावरण निर्माण गर्न पनि सम्बन्धित सरोकारवाला समक्ष महासंघले गम्भीर आग्रह गरेको छ । बीमा समितिले केहि समय अगाडि बीमा कम्पनीहरु मार्फत सित्तैमा बीमा हुन थालेको भन्दै नन ट्यारिफ विजनेसलाई न्युनतम दर निर्धारण गरिदिएको थियो । समितिले यसरी दर निर्धारण गर्दा जलविद्युत तथा निर्माण व्यवसायीहरुले महंगो बीमा शुल्क तिर्नु परेपछि व्यवसायीहरुले विरोध गर्दै आइरहेका छन् ।
