काठमाडौं– डिसहोमले एसइई दिने तयारीमा रहेका विद्यार्थीलाई लक्षित गर्दै तयारी कक्षा प्रसारण गर्ने भएको छ । तयारी कक्षाको प्रसारण डिसहोमको शोकेस २ च्यानलमार्फत गर्ने कम्पनीले जनाएको छ ।
डिसहोम लिएका तर शुल्क नतिरी लाइन काटिएका सेवाग्रहीले भने हेर्ने पाउने छैनन् ।
डिसहोमको सोकेस २ च्यानलमा मात्र प्रसारण गरिने तयारी कक्षा यही पुस १ गतेदेखि फागुन मसान्तसम्म संचालन हुनेछ।
‘उज्वल भविष्य’ भन्ने नारालाई समर्थन गर्दै संचालन गरिएको एसईई तयारी कक्षामा विद्यार्थीहरुले घरमै बसेर अंग्रेजी, गणित र विज्ञान विषयको अध्ययन गर्न सक्नेछन् ।
नेपाल सरकारबाट मान्यता प्राप्त पाठ्यक्रममा आधारित रहेर दूर शिक्षा प्रविधिमार्फत् अध्यापन गराइने यी कक्षाहरुले विद्यार्थीहरुको पढाईमा थप सहयोग पुग्ने डिसहोमले जनाएको छ ।
जस अनुसार अंग्रेजी विषयको कक्षा विहान ६ः३० बजे, गणित विषयको कक्षा विहान ७ः३० बजे र विज्ञान विषयको कक्षा विहान ८ः३० बजे प्रसारण गरिनेछ। तिनै कक्षाहरु दिउँसो क्रमशः १२ः३०, १ः३० र २ः३० बजे र तथा साँझ ६ः३०, ७ः३० र ८ः३० बजे क्रमशः पुनः प्रसारण हुने डिशहोमले जनाएको छ ।
डिशहोमका बिक्री प्रमुख रमेश सापकोटाले भने, “हामी केवल मनोरन्जनमा सीमित छैनौ । एक जिम्मेवार टिभी च्यानल प्रसारण संस्था भएको नाताले यो देश र देशका भविष्यहरु प्रति हाम्रो उत्तरदायित्व छ भन्ने राम्ररी बुझेका छौं । यसैले एसईइ दिने विद्यार्थी भाइबहिनीहरुलाई परीक्षाको तयारी गर्न सजिलो होस् भनेर यस वर्ष पनि एसईइ तयारी कक्षाको विशेष प्रसारण शुरु गरेका हौं “।
