काठमाडौं । अब बैंकबाटै धितो बन्धकी रोक्का वा फुकुवा हुने भएको छ।
भूमि व्यवस्था तथा अभिलेख विभागले एउटा परिपत्र जारी गर्दै बैंक तथा वित्तीय संस्थाबाट हुने धितो बन्धकी रोक्का वा फुकुवाको काम अनलाइनबाटै हुने जानकारी गराएको हो। भूमि व्यवस्था सहकारी तथा गरिबी निवारण मन्त्रालयले शासकीय सुधारसम्बन्धी कार्यसूचीअन्तर्गत नतिजामा आधारित शासकीय प्रबन्ध लागू गर्ने क्रममा यो व्यवस्था लागू गरिएको हो।
विभागका अनुसार यो व्यवस्था लागू भएपछि धितो बन्धकीरोक्का र फुकुवा गर्न सेवाग्राही आफैँ मालपोत नधाउनुपर्ने र बिचौलियामुक्त हुनेछ।
भूमि प्रशासन निर्देशिका, २०८१ को दफा ३९२ को उपदफा (४) बमोजिम अनुमति लिएका बैंक तथा वित्तीय संस्था यही वैशाख २१ गतेबाट यो सेवा सुरु हुनेछ। अन्य बैंक तथा वित्तीय संस्थाबाट भने आउँदा जेठ १ गतेदेखि सुरु हुने विभागले जनाएको छ।
