काठमाडौं । इरानी विदेश मन्त्रालयका प्रवक्ता इस्माइल बकाईले दुई–तीनवटा प्रमुख मुद्दामा असहमतिका कारण अमेरिकासँग सम्झौता हुन नसकेको बताएका छन्।
इरान न्युज नेटवर्कलाई बकाईले भने, ‘पाकिस्तानको मध्यस्थतामा २४ देखि २५ अप्रत्यक्ष वार्ता भएका थिए र केही अवस्थामा हामी अमेरिकी प्रतिनिधिमण्डलसँग सम्झौतामा पुगेका थियौँ तर दुई वा तीनवटा अवस्थामा विचार भिन्नता थिए र हामी सम्झौतामा पुग्न सकेनौँ।’
बकईले केवल क्षेत्र र होर्मुज स्ट्रेटजस्ता नयाँ मुद्दा थपिएपछि वार्तालाई अझ जटिल बनाएको बताए। ‘एक दिनमै सम्झौता हुने अपेक्षा गरिएको छैन’, उनले भने।
इस्माइल बकाईले अमेरिकासँगको वार्ता ‘अविश्वासको वातावरण’ मा सुरु भएको बताए। ‘एउटै बैठकमा सम्झौतामा पुग्ने सम्भावना अत्यन्तै कम रहेको छ’, उनले भने, ‘यी वार्ता ४० दिनको युद्धपछि अविश्वास र शंकाको वातावरणमा भएका थिए। स्वाभाविक रुपमा एउटै बैठकमा सम्झौता हुने आशा गर्न सकिँदैन। कसैले पनि यो अपेक्षा गरेको थिएन।’
बकाईले इरानले पाकिस्तान र यस क्षेत्रका ‘अन्य साथी’सँग सम्पर्क र संवाद जारी राख्ने पनि बताए। ‘कूटनीति कहिल्यै समाप्त हुँदैन; यो देशको हितको रक्षा गर्ने माध्यम हो’, उनले भने। –एजेन्सी
