काठमाडौं । नेपाल धितोपत्र बोर्ड (सेबोन)का अध्यक्ष सन्तोष नारायण श्रेष्ठ र शेयर लगानीकर्ताका छाता संगठनका प्रतिनिधिबीच आज छलफल भएको छ।
सेबोनको कार्यालयमा भएको भेटमा अध्यक्ष श्रेष्ठ र शेयर लगानीकर्ताका प्रतिनिधिबीच पुँजीबजारका विषयमा समसामयिक छलफल भएको थियो। छलफलमा पुँजी बजारको विकास, विस्तार तथा सुधारका लागि शेयर लगानीकर्ताका प्रतिनिधिहरुले आवश्यक सुझाव दिएका थिए।
छलफलमा अध्यक्ष श्रेष्ठले पुँजी बजारको विकास र सुधारका लागि आफू लागिपरेको बताए। लगानीकर्ताबाट प्राप्त सुझावलाई अवलम्बन गर्दै थप नीतिगत व्यवस्था गर्दै जाने उनले प्रतिबद्धता जनाएका थिए।
छलफलमा नेपाल शेयरधनी संघ, नेपाल धितोपत्र लगानीकर्ता संघ, साधारण लगानीकर्ता संघ, जनरल इन्भेस्टर एसोसिएसन नेपाल, नेपाल शेयर बजार लगानीकर्ता संघलगायतका प्रतिनिधिको उपस्थिति थियो।
