काठमाडौं । नेपाल र कतारबीच भएको नयाँ रणनीतिक सहकार्यले उड्डयन, पर्यटन, लगानी र आतिथ्य क्षेत्रमार्फत नेपाल र नेपाली नागरिकलाई बहुआयामिक लाभ पुग्ने अपेक्षा गरिएको छ। कतार एयरवेज र नेपाल एयरलाइन्सबीचको सहकार्य विस्तारसँगै हवाई पहुँच, सेवा गुणस्तर र आर्थिक अवसरहरूमा उल्लेखनीय सुधार आउने संकेत देखिएको छ।
दुबै देशका प्रमुख वायू सेवा कम्पनीबीच मंगलबार समझदारी पत्रमा हस्ताक्षर भएको हो।
हवाई यात्रामा सहजता र विकल्पको विस्तार
कतारको दोहा–काठमाडौंबीचको उडान वृद्धि र तालमेल सुधारले नेपाली यात्रुहरूलाई बढी विकल्प, प्रतिस्पर्धी भाडा र सहज ट्रान्जिट सुविधा उपलब्ध हुने अपेक्षा गरिएको छ। मध्यपूर्व, युरोप र अमेरिकामा रहेका नेपाली समुदायलाई नेपाल आउजाउ गर्न थप सहज हुनेछ। एउटै टिकट(नेपाल एयरलाइन्स वा कतार एयर)मा बहु गन्तव्य यात्रा, सहज सामान ढुवानी र समयमै उडान जोडिने जस्ता सुविधाले यात्रु अनुभवमा सुधार ल्याउनेछ।
सम्झाैताको कार्यान्वयन भएको अवस्थामा यूरोपेली मुलुकमा कतार एयरवेजको विमान चढेर दोहामा ओर्लिने नेपाली यात्रु दोहाबाट नेपाल एयरलाइन्स चढेर काठमाडाैं अवतरण गर्ने सुविधा मिल्नेछ।
पर्यटनमा वृद्धि, स्थानीय रोजगारीमा अवसर
सहकार्य विस्तारसँगै नेपालमा विदेशी पर्यटक आगमन बढ्ने अनुमान गरिएको छ। हिमाली ट्रेकिङ, सांस्कृतिक सम्पदा, लुम्बिनी, पोखरा र चितवन जस्ता गन्तव्यमा पर्यटकको चहलपहल बढ्दा होटल, रेस्टुरेन्ट, ट्राभल एजेन्सी, गाइड, यातायात सेवा र खुद्रा व्यवसायमा रोजगारी सिर्जना हुनेछ। यसले स्थानीय तहसम्म आर्थिक गतिविधि विस्तार भई आम्दानीको स्रोत बढाउनेछ।
आतिथ्य क्षेत्रमा लगानी र सीप विकास
कतारी लगानीबाट अन्तर्राष्ट्रिय स्तरका होटल तथा रिसोर्ट स्थापना हुने सम्भावनाले सेवा क्षेत्रको स्तरोन्नति हुनेछ। यससँगै आतिथ्य, व्यवस्थापन र सेवा क्षेत्रमा नेपाली युवाले अन्तर्राष्ट्रिय मापदण्डअनुसार सीप सिक्ने अवसर पाउनेछन्। नयाँ रोजगारी र सीप विकासले दीर्घकालीन मानव पूँजी सुदृढीकरणमा टेवा पुर्याउने अपेक्षा गरिएको छ।
निर्यात र व्यवसायमा टेवा
हवाई कार्गो सहकार्य विस्तारले नेपाली उत्पादन जडीबुटी, हस्तकला, तयारी पोशाक, कृषिजन्य सामग्री विश्व बजारमा छिटो र सुरक्षित रूपमा पठाउन सहजता हुनेछ। यसले साना तथा मझौला उद्यमलाई निर्यात विस्तारमा सहयोग पुग्ने र विदेशी मुद्रा आम्दानी बढ्ने सम्भावना छ।
नेपाल एयरलाइन्सको सुदृढीकरण
रणनीतिक सहकार्यबाट नेपाल एयरलाइन्सले सञ्चालन दक्षता, तालिम, प्राविधिक सहयोग र अन्तर्राष्ट्रिय नेटवर्क पहुँचमा लाभ लिन सक्नेछ। यसले दीर्घकालमा राष्ट्रिय ध्वजावाहकको प्रतिस्पर्धात्मक क्षमता बढाउन मद्दत गर्ने विश्वास गरिएको छ। पर्यटन आय, विदेशी लगानी र निर्यात वृद्धिबाट विदेशी मुद्रा भित्रिने क्रम बढ्नेछ। स्थानीय व्यवसाय फस्टाउँदा कर राजस्वमा वृद्धि भई पूर्वाधार विकासमा थप लगानी सम्भव हुनेछ। यसले समग्र आर्थिक गतिविधिमा सकारात्मक प्रभाव पार्ने अपेक्षा गरिएको छ।
